كديسة للبيع

في السودان عشان الناس مفلسه وعينها طالع تلقي الناس بتشتغل في اي حاجه وبتبيع اي حاجه وتلقي واحد قاعد جنب كوم رمال او خرصانة وخاتي لافته كبيره مكتوب عليها رمال للبيع وخرصانة للبيع و و و و

سبب كلامي الأعلان دا قريتو في احدي الصحف القطرية وتعجبت واتحيرت طبعا والإعلان
بقول

قطة او بين قوسين كدا كديسه شيرازي بيضاء سلالة اصلية سعرها 700 ريال وتاني اعلان بقول قطة شيرازي العمر شهر ونص والسعر 1000 ر . ق

شوف الناس ما عارفين يدخلو قروشهم وين وبشترو ا في الكدايس والفئران والناس ما لاقية تأكل

يا ود محجوب نمشي نفرش كدايس قدام إستاكوزا ولا شنو ؟؟ واذا لقيتوني شايل شوال كدايس وحايم في السيتي سنتر عادي جدا يا الصادق ما تتحيروا دي شغله بتجيب قروش يلا ياجدو شد حيلك ورسل لينا كدايس بدل تجدعوهم في الحواشات ونعمل للربح ابوالقاسم نص بالنص عشان لا اظلمك ولا تظلمني يعني انا اشيل 99 % وانت الباقي كلو و و و و و و و و حلال عليك

بيني وبينك لو عرضتو كلو وعرضت الكدايس الشيوخ والأمراء العرب ديل ح يشتروا يا تو فيهم ؟؟
اكيد الكدايس عشان علي الأقل عندها قيمه

ما دايرين كدايس من النوع البطلع سيره مع صينية العشاء من المطبخ
شوف لينا كدايس كدا من النوع المتحنكش وما بتأكل اي حاجه يعني كديسه عز وعينها مليانة
ما تجيب لينا كديسي (بلهجه الشوايقه ) مري (بضم الميم وكسر الراء) وعينها زايغه تجي تفضحنا وتشوه سمعه الكدسه السودانية

اذا كان مباني المدارس عندهم شبه الفلل الرئاسية بتاعتنا
كدايسهم ح تكون كييييف؟

يازول انت قايل كدايسنا ديل هينات .. ولا عشان شايفن ضبلانات يعني .. كدي هاكم قصة الشاعر سليمان مع كديسته ودي من عيون الادب الكديسي السوداني ..

قال سليمان الكراى : القصة دى فى رمضان فى الدامر .. المره ( زوجته) ساقت ولاده ومشت نهر أتبرا لزيارة أهلها ، وقال بقينا انا وكديستى ، الصباح لما أمرق على الشغل تقدمنى لا حدى الباب وترجع . فى الحقيقة البيت عدم الحاجة البتاكلها ، أنا طبعا المغرب بمشى على نسابتى قريبين ،أفطر معاهم وأشرب الشاى وإتعشى ويدونى سحورى أجيبو معاى . الدغش أقوم أهز واشرب، أصلو بكون شراب الكديسه دى مرة مرة بديها معاى، مرة تلحسو ومرة تاباهو، المهم الوضع ده ما نفع معاها قامت فاتت،
بعد الأولاد قربو يجو للعيد، قلت أفتش الكديسه سالت كديستنا وين ؟؟ قالو لى عند ناس فلان ، عندهم فيران مجنناهم ختولا اللبن للكديسه تحت السيداب (مكان مرتفع من الدوم لوضع جولات العيش فوقو، لزوم الحمايه من الأرضه والماء وغيرها ) وبقت تكتل وتاكل وبعد تشبع تكتلن وترقد جنبهن للصباح المهم جيت لى الناس ديل ، طيبين كيف الحال قلت عندنا كديستن لينا ماجاتكم ،قالو لى ياها ديك شيلا، قال شلتها ومشيت فتحت الباب ودخلت ختيتها فى الواطة…وجرى رجعت منى للناس ديك
قال زعلت منها خلاس
.وخاطبتها قلت :

ياسانتوت كديستى أنا كنت بدرى بريدك
هسه داير ألومك وبرضى نيتى أزيدك
أصلك أكان صبرت شويه قرب عيدك
بتريدى الأكل يابُره مِلا سيدك
*****
أنا يابره فى الليل ماحلب عشيتك
أنا يابره من شغل السحور ما أديتك
أنا يابره قبل الليلة ما وصيتك
الليل كلو طشى والنهار تجى بيتك
*****
الكديسه ردت على قالت :

قالت لى أنت أظن خرفان
بيتك شن بسيبو وزيرك العطشان
ما شفت اللبن بى غادى والفيران
وما ضقت اللعب فى الرمله ياسليمان
******
إنت أهملت فىَ قايل الكديس مى روح
ما بقعد معاك بالجوع أقنب أدوح
وكت الليل يهوَد والضلمه تروح
ريحة الفار متل ريحة السخينه تفوح
*****
ما بدورك!!!
ولا بكضب عليك ولا مرة واحده بزورك
إنت تشيل فروتك تمشى خابرو فطورك
تشرب شاى وتتعشى وتجيبو سحورك
*****
قال سليمان للكديسه :

أنا عارفو محلك الرحتيلو
أصلو محل كرم والجوده شيتن هيلو
أن قلتى اللحم يمكن يجيبلك كيلو
لكن فى البعرفو الزول أخيرلو الهيلو

والله كلام جميل جدا وشكرا علي المشاركه
حتي الكديسه بتزهج لما الوضع ما يعجبها وبتبيع سيدها
انحنا نزهج متين؟؟؟

رأيت الكدسه قد مالت الي من عنده اللبن *** ومن لم يكن عنده اللبن فعنه الكدسه قد ولت

يا حسن الكدايس دي بتاعت مصالح من زمن اسماعيل بتاع كتاب المطالعه
جاء اسماعيل تبدو بسمه في شفتية

ما الكدايس براها ماتظلموها

تحياتي ذاتو مظلوم

ماتنكت القديم ياريس

ماتطلق الشرار وتولع النار ياريس

اقتباس :

الباشمهندس حسن انا اقصد كل من باع وطنه وليس من سيبيع والناس الطرحو موضوع البيع لسه ما لاقين زباين والبيع له اوجه كثيرة

باعـــوا ونحــــــــنا اشـــــترينا .. واي واحـد فــينا .. قال ما لاقـــــــــينا .. واشترينا بالغــــــــــالي ...
وبصراحة الباقـي لسه ما دفعـــناهو ... العــيد كيف معـــــــــــــاكم ..
والاهمــه من دا كلوا كـديســــــــتك كــيف ..

يقول ابي عبد الله الصوري
لمَّا رأيت النَّاس قد أصبحوا -- وهمَّة الإنسان ما يجمـع
قنعت بالقوت فنلت المنـى -- والفاضل العاقل من يقنع
ولم أنافس في طلاب الغنى -- علماً بأنَّ الحرص لا ينفع