لتعم الفائدة ونبطل السخف بتاعنا

muawiya ibrahim mohmmed كتب:: انشرها لتعم الفائدة ونبطل السخف بتاعنا

تخيل كيف يكون الحال لو ما كنت سوداني

· كنت ح تلتزم بالمواعيد

· كنت ح تدفع فاتورة المحامي أوالطبيب قريبك

· كنت قاضيت المهندس اللي خرب ليك بيتك

· كنت عملت مشروعك بنفسك دون محاكاة

· كنت بدأت دوامك في الموعد المحدد - كنت حتنطق حرف ال (ق ) و ال (غ) كما ينبغي وما كنت حا تقول للتسعة تزعة

· كنت صرت متخصص وعالم في مجالك

· كنت حتلبس شيك جدا عند خروجك أمام التلفاز وأجهزة الاعلام

· كنت تتحدث بطلاقة وإنسيابية بدون أ أ أ أ أ أ

· ولو ما كنت سودانى كنت عرفت أن باللدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك ودرست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالذات يعنى اخنق فطس.

· كنت ح تتصل بالتلفون قبل زيارة أحد في منزله بدري شويه، مش و أنت في خشم الباب، ده طبعا لو اتصلت وما جيت داخل زي قدر الله بدون حتي ماتدق الباب، وتدقو ليه؟؟مش في سلك تجرو وتدخل!!بدون مراعاة لحرمة البيت

· ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي اولادك ورافع لي ناس البيت الضغط والسكري...

· كنت حا تتوقع بحصل شنو لما ترقد طفلك الصغير بدون بامبرز في سرير في بيت ناس!! واولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بي دم قلبهم ..والطامة الكبري لو كان عندهم حوض سمك .

· و كنت ح تتردد في أخذهم معاك المرة الجاية لنفس البيت، علشان يبهدلوه مرة تانية..

· كنت ح تتردد في إعطاء رقم تلفون أو عنوان شخص ما.. دون إذنه أو حتي سؤاله إنكان عندو رغبة يتواصل مع الناس ديل أو مفهمهم انو ما عندوا تلفون من اصلو بدل تورطو وتحرجو كدة!!!.وكنت امتنعت عن السماح بجلوس طفلك الرضيع في المقعد الأمامي على حجر والده او والدته ولمن يحصل حادث . . الحبيب ياكلها لا لذنب جناهو سوي انو اهلو سودانين!!.

· كنت ح تترد في زيارة شخص ما.. أنصاص الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء علي امل انك تمشي وتخليهم ينومو وانت برضو قاعد تبرأ فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!

· ولو ما كنت سوداني ...كنت ح تخلي الصغار في البيت عندما تكون المناسبة مناسبة كبار..- كنت اتونست بصوت معقول، خصوصاً عندما يكون الطرف الأخر قاعد جنبك في نفس الكنبة.. ويا حبذا عندما يكون الطرف الاخر ساكت...كنت امتنعت عن التدخين في منزل شخص آخر، او على الاقل استأذنت قبل ما تولع

· كنت ترددت في ارسال حاجات وزنها خمسة كيلو وما فوق مع كل من تسمع بأنه ماشي السودان...كنت رجعت القروش الاستلفتها في وقتها, أو في الحقيقة رجعتها و بس.

· كنت امتنعت عن زيارة احدهم في مكتبه، للونسة او مناقشة امور لا صلة لها بالعمل

· كنت خجلت من عدد المسكولات التي تعملها، مش كمان تقول 'شنو يا فردة, خمسه مسكولات ما ترد عليها؟ والله الفيك اتعرفت'..

· كنت حا تقعد فى صالون الناس بدل تلوص فى البيت كلو.

· كنت ح تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر فى مخك ( لو كان فى يعنى)

· كنت ما حا تمشي مستشفى الولادة وتقعد تحقن النسوان الفى العنبر كلهم واللللللللللله عيب كبير يا سودانيين اصلا ما شفت غيركم بتحاوم فى عنابر الولادة وكمان معاها هرجلة وإزعاج ..اصلا انتو البوديكم شنو مستشفي الولادة؟؟ عشان تودو نسوانكم اوكي آمنّا بالله طيب اقعدوا في الاستقبال لزومو شنو الحوامة في العنابر يعني حبكت تباركو للام .. استنو لمن تطلع في البيت أما لو كانت اختك او زوجة اخوك يا ريت الزيارة تكون من طرف الاوضة وتتوكل علي الله ..

· ولو ما كنت سودانى كنت بطلت تطلع بالعراقى والسروال والسفنجة وراسك مكشوف وصوتك يجيب الطاش.

· لو ما كنت سودانى ما كنت اكلت ميراث اخوانك الصغار واستوليت على بيت ابوك لى يوم يبعثون عشان بس انت الكبير!!

· ولو ما كنت سودانى كنت إبتكرت فى خريطة بيتك بدل تشف حقت صاحبك بالكربون وكنت استثمرت فى حاجة غير الركشة !! ومحلات الاتصالات !!

· ولو ما كنت سودانى كنت عرفت وين ترمي السفة وكيف تتخلص من الأكياس والأوراق والنفايات،

· ولو ما كنت سوداني كنت عرفت تسوق سيارتك في خط مستقيم،

· ولوما كنت سوداني كنت قدرت تجعل من السودان بلد بيهو نعتز،

· ولو ما كنت سودااااااااااانى ما كنت سقت معاك كتيبة وانت ماشى المطار وما كنت عملت الضوضاء والغوغاء العجيبة البتعملوها فى المطارات ولابسين الجلاليب والبراطيش وراسكم كاشف وفي احسن الاحوال لابسين طاقية ويوم تحبو تقشرو تلبسو مركوب نمر يقزز .. ونسوانكم معنكشين بى دهب البيت كلو ولابسين الاحمر والاخضر والترتر وزفة الوان ما شوفناها حتي في اعتي صحن سلطة ده غير شباشب الظار البرتقالي والليموني وهلمجرا وشفعكم يكوركو ويتساككو ده غير التحنيس والدناءة عشان يمشو ليك الوزن !!!

· ولو ما كنتو سودانين كنت قعدتو محترمين فى الطيارة وما قرفتو المضيفات بي الطلبات والاصوات والمشية والجية والهمجية وبكاء الشفع والشنط والكراتين والصفايح الداخلين بيها الطيارة والاصوات العالية والجلاليب الشربانة وما كان نسوانكم غيرو التياب فى الطيارة وما كنتو فكيتو الاحزمة ووقفتو قبل الطيارة تنزل..

· لو ما كنت سودانى ما كان ممكن تدخل فى زول شمال وتقول ليهو راتبك كم؟؟؟؟

· ولو ما كنت سودانى ما كان ممكن تفكر انك تمشى عرس بتاع ناس وتقيف بكل بجاحة تصور العروس بى موبايلك وانت ما بتقرب للعروس ولا حتى بى حواء وآدم بدون ما تسأل نفسك منو الاداك الحق ده في إختراق خصوصيات الناس ومنو السمح ليك تدخل وتتعشي وتصور!!!! .

· ولو ما كنت سودانى ما كنت طلعت من شغلك ولمدة ثلاثة ايام وسبت المراجعين يتبهدلو عشان حبوبة جار جاركم ماتت عن عمر يناهز المية وشوية والبكا جاى خبر من الشمالية.. والمراجعين برضو لو ما كانو سودانيين ما كان سكتو عن حقهم وكل يوم يمشو ويجو المؤسسة عشان موضوع تافه ما بياخد اكتر من عشرة دقايق!!!

· لو ما كنت سودانى كنت استفدت من غربتك وأمنت مستقبل اولادك وقدمت استقالتك ورجعت بلدك بي كرعينك مش بالصندوق..

· لو ما كنت سودانى ما كان كل يوم جاييك تلفون رسل وجيب وحول عشان هم يقعدوا ياكلو فى حقك لا شغل لا مشغلة ويشتغلو ليه؟؟كفاية عندهم سودانى مغفل زيهم يرسل بدون تفكير ..

· ولو ما كنت سودانى مستحيييييييييييييييل تدى اخوك يبنى ليك بيتك وترجع بعد خمسة سنين تلقاو لسة ما حفر الساس ولو سألتو عن القروش الحولتها طول السنين دي يزعل منك ويخاصمك ويعملها حكاية طويلة وعريضة ولو ما كانو اهلك زااااتهم سودانييين ما كان غلطوك وطلعوك انت الكعب!!وجبروك تسكت عن حقك وطلعت من الموضوع بي ازمة نفسية!!

· صدقنى لو ما كنت سودانى كانت حياتك مشت بى اريحية ونظام ورااااااااحة كانت مجاملاتك حا تكون حلوة وفى حدود المعقول بدل كل يوم جاري ولاهث من بيت لي بيت في الفارغة والمليانة!!.

· كنت نمت لما تحب وتصحى لمن تحب..كنت انت القررت مشروع زواجك بمن تحب بدل القبيلة كلها تقرر معاك..ويجزمو بأغلظ الإيمان انو فلانة هي البتناسبك !!!عرفو احتياجاتك كيف؟؟ميولك كيف؟؟طلبك كيف؟؟ انا ما عارف!!!!!.

· كنت سميت اولادك الاسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبو الام ابسط الحقوق انها تسمي الكائن الكانت شايلاو تسعة شهور وتعبانة فيهو ده!!!

· كنت استمتعت باجازتك وبى وقتك وحياتك بدل كل واحد يديك الفتوي الفى دماغو..لو ما كنت سودانى كنت حا تكون سييييييييييد نفسك وووووووووووووووووووووووووووووووووووووو.

**********************

الرجاء إضافة وجهة نظرك....

كنت حسنت اسلوبك شوية ..وقلت كلام حلو (إضافة ومشاركة)

الله لو ماااااااااااااااكنت سوداني (امنية عزيزة)

كنت ارتحت من المجاملات الاتلفت اعصابي دي (احلام يقظة)

كنت خليت اسلوب الامر والنهى (مشاركة)

كنت اهتميت بى اولادك اكتر من الضيوف يا زول "إضافة"

كنت استمتعت بى ماهيتي برااااااااااااااااااااااااااااااااااااااااااااي " واحد موجوع"

علي الطلاق بالتلاتة لو ما كنت سوداني كنت رجعت السودان !!!!!!!!! "أفهموها براكم"

لو ما كنت قشراني ما كان ضغطي ارتفع من مناظر القشرانين المبهدلين البشوفهم في الشارع (واحد قرفان)

لو ما كنت سوداني كنت ارتحت من القناة السودانية المشغلاها مرتي ليل ونهار وكنت ارتحت من الالوان النارية بتاعت المذيعات واهم حاجة كنت ارتحت من المذيع الاسمو اساااااااااامة الخليفة((واحد مستاءءءءءء من تلفزيون السودان))

يا أبو الشباب اسامة الخليفة برااااااو؟؟؟وايمان ......... ((استغفر الله العظيم)) وغيرهم وغيرهم والهبل بتاعين فرق الكوميديا القايمين ليهم في عباطة جديدة ديل والاماكن الاعبط البصورو فيها والوساخة وعربات الكارو والركشات ووووووووووووووووووووووووووووووووو الوجع كتيييييير((واحد ممغوس))

كنت حا انوم في سريري!!!ما تستغربو !!! طول الوقت كان معانا ضيوف مأخدين سريري "واحد مغيوظ"

كنت..... ولأ مافي داعي.(واحد خواف)

كنت ح تهتم بمظهرك وإنت حايم فى الشارع مبهدل ومنظرك لا يوحى لأى شخص بإحترامك "إضافة"

(الأخ السودانى الكريم..... لو تذكرت أى عيب فينا أرجو إضافته مشكوراً لا لكى نفضح أنفسـنا و لكن لكى نرى أنفسـنا بوضـوح و شـفافية )

كنت بداءت موضوعك عند الاتصال او مقابلة اي شخص لك معه عمل بدل مقدمة السلام اكثر من 5دقايق

كنت تركت مشاهدة هلال مريخ في التلفاز او الذهاب للاستاد لان من يحملون الشعار امثال علاء الدين يوسف وموسي الذومه

كنت تركت البحلقه عندما تري سوداني في الغربه ولا تكلف نفسك بالسلام

لو ما كنتي سودانيه كنت اهتميتي بجمال مظهرك وقوامك بدل الشحوم المتورمه وكمان عاوزه تسمني زياده

كنتي ارتديتي ملابس جميله في البيت بدل تلبسيها فقط عند المناسبات

لو ما كنت سوداني كنت قلت الغلط غلط امام كل انسان مش لانو الغلطان من العائله وعيب تقول ليهو كلامك غلط

لووووووووووووو مااااااااااااااااااااااااااااااااااااااااااا كنت سوداني كيف كان يكون الحااااااااااااااااااااااااااااااال

[color=blue]

د. الحبر يوسف نور الدائم

السودان بلد ذو تاريخ قديم ضارب بجذوره، نشأت فيه حضارات متنوعة، وهبت عليه رياح مختلفة، وأثرت فيه تيارات صواخب.
وقد انفتحت حدوده على هجرات إنسانية كان لها تأثيرها البعيد في تكوين الشخصية السودانية بأبعادها المتباينة فكرًا وسلوكًا، وعادات وتقاليد.
صلات ووشائج

وما من شك في أن للصلات الإنسانية شأنها؛ إذ للاحتكاك والتفاعل آثاره سلبًا وإيجابًا.

وكان لكل مجموعة من المجموعات التي هاجرت للسودان إنتماؤها الفكري والقبلي، وكان لكل منها دوافعها التي حدت بها للتحرك والنزوح، ومنهم أصحاب دعوة ورسالة، ومنهم أصحاب طمع في رغد العيش وسعته، ومنهم أهل استكشاف ومغامرة واقتحام.

واستطاعت تلك المجموعات المتنقلة بحضارتها وثقافتها وأعرافها أن تتفاعل مع السكان الأصليين، وأن تقيم معهم علاقات إنسانية في مجالات شتى؛ فكانت العلاقات الاقتصادية من زراعة وتجارة، وكانت العلاقات الاجتماعية من مصاهرة وتزاوج، وكانت العلاقات السياسية من حكم وقضاء وحسم ما قد يقع من تنازع قد يفضي إلى معارك ضارية قد تنتهي إلى مسالمة ومعاهدات ومواثيق؛ فالنوبة مثلاً (رماة الحدق) كانت بينهم وبين المسلمين معاهدة معروفة ومشهورة.

وهكذا كان بين أهل السودان وغيرهم من الصلات وشائج؛ إذ كانت حدودهم مفتوحة؛ تتفاعل مع كل وافد، ولم يعيشوا قط في جزيرة معزولة مقطوعة عما سواها؛ فكانت لهم صلاتهم مع ساكني الشمال من أهل مصر من عهد الفرعون، واستطاع بعض ملوكهم أن ينتصروا على بعض حكام مصر، وهكذا دوى اسم بعانخي وترهاقا في التاريخ؛ وحفروا أسماءهم في ذاكرته حفرًا، ثم كانت لهم مملكاتهم وحضارتهم في مروي ونبته؛ فإذا ما هبت رياحهم المسيحية تكونت سوبا وعلوة؛ حتى إذا أذن الله لشمس الإسلام أن تشرق على أهل السودان فتخرجهم بإذن ربهم من الظلمات إلى النور دخلوا في دين الله - تعالى -أفواجًا، وأقبلت ريح طيبة من الشمال والشرق، ومن الشمال الغربي، وانتشر العلم وذاع، وعلت القيم وسمت الفضائل، وكونت الممالك في تقلي وسنار وفي غيرها من بلاد السودان، وظهرت شخصيات إسلامية ضخمة حملت لواء الدعوة الإسلامية عاليًا خفاقًا؛ فتوحد الناس تحت راية لا إله إلا الله محمد رسول الله، وانتصروا على عدو الله وعدوهم، وحرروا البلاد والعباد، ورفعوا الظلم والضيم عن كاهل المقهورين والمستعبدين.

[b]أثر الإسلام[/color]

وما من ريب عندي أن للإسلام خاص الأثر البعيد الذي لا يمحى في تكوين الشخصية السودانية؛ حتى بالنسية للذين لم يعتنقوا الإسلام دينًا؛ وذلك لأنه الأقوى بكتابه، وسنته، وشرعته، ومنهاجه، وأسلوبه في التعامل، والتحاكم؛ وسنحاول أن نضرب أمثلة على ذلكم التأثير العميق، والانقلاب الهائل الذي أحدثه الإسلام في حياة السودانيين الذي أنشؤوا له المساجد التي عمروها بحلق الذكر، والخلاوي التي أوقدوا فيها نار القرآن (وتقابته) الثاقبة التي لا تخبو:

أتذكر نارًا أوقدت حول خلوة عِشاءًا تغنى بالكتاب المنزل

بل إن كثيرًا من مدن السودان وقراه إنما تعرف بعلمائها وشيوخها وصالحيها، وما من عالم من العلماء العاملين الصالحين يحط في منزل إلا تجمع الناس من حوله؛ وأسلسوا له القياد؛ فكان لهم دليلاً يرشد، ومنارة تضيء، ولواءًا يرفع؛ فالسودانيون من قديم ذوو حس ديني مرهف، وقلوبهم صناديق مغلقة مفتاحها العقيدة؛ فمن أدار هذا المفتاح بمهارة اتبعوه، وربما اكتشفوا فيه شيئًا من مخاتلة أو مخادعة فانفضوا منحوله.

ومما يدلك على هذا الحس الديني الرهيف عند السودانيين أنه يصبغ حياتهم في جملتها؛ ولك أن تنظر في أحوال حتى غير المتدينين منهم؛ فلربما أبصرت رجلاً يتعاطى الخمر وقد لا يصلى ولا يرتاد مسجدًا ولكنك إذا سببت له دينًا، أو أسأت إلى الرسول الكريم رأيت منه غضبة مضرية؛ لا يقوم لها شيء أبدًا..وانظر في أمثالهم، وفي قصصهم الأسطورية القديمة تجد عجبًا؛ فتفسيرهم لعدم تمكن النعام من الطيران - على ما له من جسم ضخم، وجناحين قويين هو أنه اغتر بقوته؛ وذلك إذ قال الطير: (بَاكِرْ الله إن قِبِل نَرِد أم زِبِل)؛ فقال النعام اعتدادًا بقوته وعنفوانه، وثقته في قدرته وصلابته: (باكر الله إن قبل وإِمَّا قبل نرد ام زبل)؛ فأصابه ما أصابه من لعنة الغرور والتحدي، والاكتفاء والاستغناء، وعدم الاستثناء فمكن الطير؛ لاستثنائه، وحسن تأدبه مع الخالق، ومنع النعام؛ لسوء أدبه وحماقته وتفريطه.

ومن هذا الباب فإن السوداني الأصيل يبرأ إلى الله - عز وجل - من الحول والطول والقوة؛ ولا يقول كما قال قارون الذي آتاه الله - تعالى -من الكنوز ما إن مفاتحه لتنوء بالعصبة أولي القوة؛ (إنما أوتيته على علم عندي)، ولكنه يقول في أدب جم، وتواضع كريم، وإيمان عميق: (كريمًا أدى غشيم) وإيمانه بالغيب عميق؛ لا تحوم حوله شبهة، ولا غشاوة؛ (أنفق ما في الجيب يأتيك ما في الغيب)، وأمله في الله - تعالى -قوي أخضر مشع؛ (الغائب في ضرا شدرة)، و(الحاري أخير من المتعشي).

عزة النفس[/u]
ه[u]ذا، وهناك كثير من القيم التي دعا إليها الإسلام؛ وصاغت الشخصية السودانية صياغة جيدة محكمة.. من ذلك مثلاً: (عزة النفس)؛ والسودانيين قوم أولو عزة وأنفٍ؛ لا يقرون ظلمًا، ولا يقبلون ضيمًا، ورأسمالهم كرامتهم..

ولعل القارئ الكريم قد سمع بأولئك الذين أغلقوا عليهم دورهم في سنة 6؛ سنة القحط؛ إذ أنهم لا يريدون أن يتكففوا الناس، ولا يريدون أن يريقوا ماء الوجوه في سبيل لقمة تدفع عنهم مسغبة، ثم إنهم لا كبير عندهم إلاَّ الله - تعالى -..

أما البشر فإنهم يعاملونهم بالمثل؛ ولا يعظمون أحدًا لماله، ولا لجاهه، ولا لسلطانه؛ (يا الباشا الغشيم قول لي جدادك كر)، (الباشا دا البِشْكُولُه شِنْ عَرْضُو وشِنْ طُولُو؛ كان حِرِم حَلَّلُوا حتى شرق الله البارد هولو)، وإن أسأت لأحدهم فإنه ينتصر ما استطاع؛ (والذين إذا أصابهم البغي هم ينتصرون)، (لا يحب الله الجهر بالسوء إلا من ظُلم)، (إن لصاحب الحق مقالاً)، ولسان حاله يقول:

ولست بمفراح إذا الدهـر شرني * * * ولا جازع من صـرفه المتقـلب

ولست أريد الشر والشـر تاركي * * *ولكن متى أحمل على الشر أركب

وإن زارك سوداني مهما كان وضعك، ومهما كانت منزلتك فلتحذر أن يشتمّ منك رائحة ازدراء له، أو استخفاف به، أو التفاتة عنه؛ فعندها تقوم القيامة، وعندها (كبير الجمل)، وعندها (عِيْنًا تشوفك تِنْقَدّ)، وعندها (كُراعًا تَجِيْكْ تاني تِنْقَطِعْ)..

ومما يحكى أن سودانيًا زار بعض إخوان لنا من العرب فقال له وهو بالداخل: (إرجعوا)؛ فقال السوداني: (هِيْ آية، وفي كتاب الله، لكن علي الطلاق مِمَّا نزلت زُوْلاً طبقا غيرك مافي!؛ وتاني أنَّجِيك!!.. )..

السماحة
ومما يتماز به السوداني أنه إنسان متسامح، وعنده قدرة على التواصل مع الآخرين، والتعايش معهم، والتعاطي، ولكن هذه الصفة ينبغي أن تفهم في سياقها، وأن توضع في إطارها.

وليست هذه الصفة بمعزل عما أشرنا إليه آنفًا من عزة وكرامة وأنف. ومن لا يمازج بين هاتين الصفتين (صفة التسامح، وصفة العزة) فإنه يقع في خطأ جسيم، وسوء تقدير، ولسرعان ما يدرك أنه أكثر الخز، وأخطأ المفصل؛ وذلك أن السوداني سيقلب له ظهر المِجَنّ، وسيريه الوجه الآخر من العملة؛ السوداني (تاكُلْ وُتَقُشّ في طَرَفُه) ولكن حذار من أن تقترب من دائرة الممنوع!؛ حذار أن يرى منك ظلمًا، أو ازدراء؛

(فللحلم أوقات وللجهل مثلها)؛ كما قال الشريف الرضي:

ولي في مجال العلم علم يزينني * * * ولي في مجال الجهل جهل مركب

وكما قال محمد سعيد الكهربجي وهو يعبِّر عن نفس سوداني خالص:

فمن شاء تقويمي فإني مقـوم * * * ومن شاء تعويجي فإني معوج

وأختم هذه المقالة بثلاثة أبيات: اثنان لعنترة، والثالث للشنفري، وكلاهما آدمي، ولهما من السودانيين شبه ونسب!:

قال عنترة:

أثني عليّ بما علمت فإنني * * * سمح مخالقتي إذا لم أظلم

فإذا ظلمت فإن ظلمي باسـل * * *مر مذاقته كطعـم العلقم

قال الشنفري:

وإني لحلو إن أريدت حلاوتي * * * ومر إذا نفس العزوف استمرت

وآخر دعوانا أن الحمد لله رب العالمين، وصلِّ اللهم على سيدنا محمد، وسلم تسليمًا كثيرًا

[/b]

مازال السودان والسوداني بخير - مع حاجتنا لمراجعة بعض السلوكيات - والأهم من ذلك الإبقاء على الصفات النبيله التي لدينا والتي تؤشك على الإندثار

» عناوين بعض الصحف السياسيه والفنيه
» القلم مثله مثل السيف والرمح ..