عــن الشـفـتـنـة

الشفتنة من شفت
ا
شفت كلمة انجليزية >> Shift

ومعناها: تغيير / نقل

ومستخدمة في حياتنا كثير

وبالذات لمن يعملون بنظام المناوبة فنقول ( فلان شغال شفت ليل)

وايضا بنفس المعنى موجودة في الكيبورد بتاع الكمبيوتر

ولها استخدامات كثيرة ومعظمها يدل على تغيير وضع معين

مثلا: من عربي الى انجليزي او من الحروف الصغيرة الى الكبيرة وهكذا

او ممكن تدي معنى اخر للفعل بمعنى ( تولى امره بنفسه )

ومن هنا جاء استخدام عبارة شفت وشفتنة المستخدمة باللهجة العامية

ولكنها ارتبطت في ذهن السودانيين

بأن الشخص الشفت هو الشخص الذي يعرف مداخل ومخارج الامور

وهو المعنى المقابل لدى الشباب بان الشفت هو

الشخص المفتح او التفتيحة وسيد قلبا والمقددا او كما يقال

لكن في ناس فاهمين الشفتنة غلط

ومفتكرين انو الشفتنة او الزول الشفت

هو الذي يأخذ ما لدى الغير

بحق او بدون حق

يعني تمشيا بنظرية

( حقك ما حقك قول حقك يدخلو الاجاويد يقسمو النُص )

وفي ناس ماخدين الشفتنة

هي الكلام النهائي

يعني ما في تنازلات و لا مزايدات

وقدوتهم في ذلك

امثال صلاح ادريس

رئيس الهلال السابق

الذي اطلقو عليه لقب الرئيس الشفت

لانو بتاع تصريحات وظهور وتحديات وخرخار كمان

الشفتنة دايرة ليها

نشاط وحماس وغيرة

ومش كل من هب ودب يعمل فيها شفت

سلامك للناس يكون بشفتنة

يعني بحرارة وما تكتل حيلك

وتسلم علي الزول لمن تحبطو

الشفتنة برضو ممكن تكون

في صورة الكرم

وده ما شرط الواحد يكون

حالتو المالية كويسة

وممكن في الحالة دي

الهمة والنشاط يغطو

على باقي القصور المادي

يعني هنا الشفتنة تكون

باستخدام النظرية العسكرية

( الحماس يغطي على الغلط )

الشفتنة الزول ما يتكلم ورا الناس

يعني تلقا واحد ما عندو شغلة

غير يقعد ويصنف في الناس على مزاجو

ويقيم فيهم

على حسب ما يوافق او يعترض لمصلحتو

واذا صادف زول معارض لمصلحتو

او زي مابيقولو ليك( الزول ده ما منو كده)

تلقا يهاجمو ليك في اي مجتمع

وبدون اي ذنب ولا سبب

والتصنيف يكون

(والله الزول ده كعب خلاص)

ويشيل ويزيد ومرات يكضب كمان

ويذكر كل ما هو سئ بخصوص هذا الفلان

وممكن يكون فلان ده ساعده كثير

ووقف معاهو في مواقف كثيرة

ولكن بس عشان حاجة بسيطة

ينسى ليك حنانو زاتو

والغريبة لمن يقابل فلان ده

تلقاهو يسلم عليهو زي ما حصل شئ

تمشيا بنظرية

( نبُش في وجوههم وقلوبنا تلعنهم )

دي برضو ما شفتنة ولا اي حاجة

الشفتنة عندك مشكلة مع زول

او عندك رأي في زول

احسن تواجهو عديل

وتقول العندك بكل صراحة

بدل النسنسة لليسوى والمايسوى

وشخص زي ده دائما ما يوصف بصفات النسوان

لكن انا في رأي

النسوان افضل منو

لانو المرا لو ما عجبتا زولة

بتقعد تحدر ليهاكووويس

وتلدغا ليك بي كلمة كلمتين

لمن تعرف حاجة

لكن للاسف الرجال او خلينا نقول بعض منهم

عكس كده تماما يعني قدامك عادي وبي وراك

عامل فيها ابو الفس زاتو

ودي برضو لا شفتنة ولا حاجة

والزول الزي ده

بكون واهم نفسو في الفاضي

زائر

موضوع يفطس من الضحك

والدنيا دي علي كدة مليانه جنس شفتنه

هادية شيخ عووضة كتب:: موضوع يفطس من الضحك

والدنيا دي علي كدة مليانه جنس شفتنه

مشكورة يا هادية

على الشفتنة الحلوة ... اقصد الاضافة الحلوة

نحن شلة شفاتة

بنحب تلاتة تلاتة

ونحن الريدة زاته

اعلاه ، نموذج (محترم ) وما خفي كان اعظم

لمصطلحات وعبارات وشعارات

من يعتقد ان الشفتنة هي

ان يكون في كلامك و تعاملك مع من حولك

نوع من الايحاءات الجنسية ومشتقاتها

ونقول ليه يا حبه

الشفتنة بهذا الفهم

هي عدم القدرة في التعامل مع الاخرين

وبرضو لا شفتنة ولا حاجة

و ده بيسموه زول فارغ

وتبقى الشفتنة الحقيقية هي

ان تكون شخص محنك

تمتلك الخبرة في ادارة الامور

وصاحب شخصية قوية

تمكنك ان تقول الحق ولو على نفسك

و أن لا ترضى الظلم عليك ولا على غيرك

يا ولد يا شفت شفت الموضوع ده شايت فى القوون السودانى

واليكم مثلا استخدام كلمة (شاطرٌ) وهى متداولة بيننا تداولاً كبيراً

وعادةً ما نصف بها من نراه يتوقّد .. ذكاءً وفطنةً ومهارةً

لكن لنلقِ نظرة سريعة على معناها الحقيقي

من خلال بعض معاجمنا وقواميسنا العربية

الشاطر : الخبيث الفاجر فى "المعجم الوسيط"
الشاطرُ من أعيا أهله خُبثاًأي أتعبهم !فى"القاموس المحيط للفيروز آبادي"

وما اكثر عباراتنا الخاطئه ... نسال الله اصلاح الحال

eng_monzer كتب:: يا ولد يا شفت شفت الموضوع ده شايت فى القوون السودانى

واليكم مثلا استخدام كلمة (شاطرٌ) وهى متداولة بيننا تداولاً كبيراً

وعادةً ما نصف بها من نراه يتوقّد .. ذكاءً وفطنةً ومهارةً

لكن لنلقِ نظرة سريعة على معناها الحقيقي

من خلال بعض معاجمنا وقواميسنا العربية

الشاطر : الخبيث الفاجر فى "المعجم الوسيط"
الشاطرُ من أعيا أهله خُبثاًأي أتعبهم !فى"القاموس المحيط للفيروز آبادي"

وما اكثر عباراتنا الخاطئه ... نسال الله اصلاح الحال

مشكور يا باشمهندس على حضورك الانيق

واضافاتك المفيدة

لك التحيه موضوع خفيف ومنعش
بس صلاح ادريس سمي بالشفت عشان طوع القوانين وحير عتاولت الاتحاد في السودان
منها فقه المسكوت عنه
والاعارات في نصف الموسم
و تغيير الهويه
وغيرها كثير
شفتو كيف شفت ؟؟!!!

والله ياابوبكــــــــــر موضوع جميل ومعلومه مفيده وكل يوم امر عليهو بس ماعارف اكتب ايه
مشكور