جــــــــــــــــــــــــــــــــــــــــواب لي البندر

غايتو حاصل الحصل جانا وفد في المصنع زاير.. وكان الوفد ده امريكاني
لف وفات اليوم والتاني... جانا مدير المصنع فاير وشو حمار العمدة العاير
قال المصنع فيهو خساير... الا يخفضو ميتين عامل...ميتين عامل يبقو هوامل..!!
ما يهموش الهم المصنع... تف قرارو وفات في حالو..
نقابيين ومسؤولين مافي العارض ولا اللي احتج..
العمال من سمعو احتجو .. سيرو موكب صامت وصامد..اضامنا معاهم وسرنا..متجاوزين العرف السايد
العرام دور عربيتو.. طبعا العربية الامريكية..زنقح وخلى الموكب ثابت
احتجينا مع الاحتج واتكلمنا كلام موضوعي...
قلنا المصنع حق الدولة والعمال اصحاب الحق..هي البتقرر والبتتولى وهي البنحدد سير المصنع
ايد العامل هي القعد تنتج مو المكنات الامريكية... زيت العامل هو البطلع مو المكنات الامريكية
درن الايدي العمالية انظف من لسنات الفجرة.. ودين الدقن الشيطانية وكرفتة البنك الدولي وكل وجوه الراسمالية
داك الحين المصنع هاج .. وجات عربات اللات بوليس فضو العالم بالكرباج والبومبان الامريكاني
شرقت شمس اليوم والتاني
كنا حداشر ونوباوية متهمننا بالتحريض والتخريب والشيوعية
البوليس طلعني شيوعي .. التحقيق طلعني مدان..التحقيق طبعا تحقيقهم الامريكان
اسبوعين عشناهم جوه اسبوعين زادننا قوة

..... الشوق الواحد لي حلتنا وليكم وللاشراقة الفي عينيكم[/color]