تبادل الهدايا بين الناس

اخى استاذ الصادق ا لان اكلمك من سوق البطحاء العام فى الرياض حيث كان الهدف من هذة الزيارة
شراء هدايا الى كل الاحبة والاهل فى السودان ماخليت زول ولا وضعت اسمو فى لائحة اسماء توزيع الهدايا
بعد يوم كرامة الوصول عارف لية خايفين اللوم البيتفى فى ظل الضحى داك وايضا لااحيا لروح المحبة والتقدير
والود يعنى ماعايزين نقادر ونشوف لينا زول عاوج خشمو بى ورانا وقدر الله مايعزمونى ولا مايهتمو بى شوية على القسم اشيل حسهم وقدر الله مايجو يشربو معاى جبنة الصباح ويصبحو على المغترب

اخى الصادق عن جد موضوع اثار زكريات وصور جميلة منقوشة فى الزاكرة عندما كان المغترب مغترب يأتى محملا باشكال مختلفة من الشنط والشنطة الكبيرة طبعا شنطة الهدايا والغريب انه كان عندما يصل احد المغتربين الى المنزل تكون هناك روائح مميزة لمتاعهم وللغرفة التى يضعون فيها حاجياتهم وهذه الرائحة يا الله كم افتقدها مشحونة بلقيا المغتربين والفرح بهم وبهداياهم ايام كنا ننظر للمغترب وكأنه آتى من كوكب آخر يا فلان تعال بجاى تعال فى ناس عايزين يسلموا عليك تعال حبوبتك فى الصالون دايراك عمتك قالت تجى تتغدى عندهم ناس عمك اصروا ضبيحة الجمعة عندهم والفتى المدلل يسير فى تيه وافتخار بين الجموع
والغريب وهذا اذكره جيدا عندما كانت توزع الهدايا وكانت توكل لى مهمة كتابة الاسامى على الهدايا حتى لا يسقط اسم سهوا كانوا يتوقعون من بعض الاشخاص الا تروقهم رقم تميزها فيضيفون لها مثلا مقطع جلابية او عطر وتقوم الوالدة عليها رحمه الله باضافى مكعبات مرق الدجاج والمعجون والصابون ثم وكان هذا المشهد يتككرر كثيرا بأن يأتى شخص ويقول انه يريد ان تغير هديته والله كان هذا يحدث بالفعل الجدل فى نوعية الهدية
وكثيرا ما غضبت عندما كنت اجد بعد انقضاء الفترة الاولى من وصولهم وزخم الضيوف والمباركين بوصولهم عندما انتبه ان حصتى من الهدايا نقصت كثيرا وتقول لى الوالدة ايوة والله فى ناس كنا ناسينهم وعيب كمان مان نديهم وانا بكلم اخوانك يجيبوا ليك تانى ووطبعا مواعيد عرقوب ويتنسى الكلام فى محلو

ياحليل زمان وليرحم الله ابائنا وامهاتنا بقدر ما قدموا وان يجعله فى ميزان الحسنات يارب العالمين