عـــــــوم الحفير ممنـــــــوع....لمـــــــاذا؟

عوم الحفير ممنـــــوع ........لماذا؟؟؟؟

زماااان لمن كنا نجى في اجازة المدارس للغابة كان من اهم البرامج عوم الحفير... وبعد كبرنا شوية بقى عوم البحر ... لكن مع ذلك كلو انا لحدي هسة مابعرف اعوم ...!!!... ماتستغربوا للكلام ده .... طبعا ده ما الموضوع ...

الموضوع هو عوم الحفير الممنوع.... عشان شنو؟؟ ... ماعارفين !!...لكن مع كل التحذيرات التي كانت تصدر من كل كبار القوم رجالا ونساءا لم نكن نكف عن العوم برغم التهديدات الكثيرة التى كانت تجابهنا والتى لم يكن من بينها اطلاقا الغرق حيث لم يكن مهددا لأن الحفير (افطح) وماغريق اللهم الا بعض المناطق مثل كبرى المناصرة وكبرى الننتنى (نحنا كنا بنقول المنتنى لكن قريت فى رواية عمشيقة الننتنى والعهدة علي الراوي)... اما اهم المهددات فهي العسكري ... وانا ماعارف التسمية دي جات من وين لأنو الزول اب عراقي وعمة ده لايمت للعسكرية بصلة وكمان الوسيلة المستخدمة حمار يعنى ما ناقة عشان نقول هجانة ولافرس عشان نقول خيالة ... اها الزول ده كان بشكل تهديد كبير على عومنا ... انا ماعارف العقوبة شنو في حالة قبض على واحد مننا ؟؟؟؟... التهديد الثاني كان هدومنا والخوف من ضياعها او استحواذ زول كبير عليها فكنا نلجأ الي حراستها بواسطة زول مننا او ندسها في قعر تمراية ... ودي ماكانت مشكلة كبيرة الا انو في بعض المرات وقعت هذه الهدوم اسيرة في يد العدو وكان ابرزها قصة حاتم سعد وبابكر عباس ( ارجو من حاتم ان يرويها لكم )وقصة هشام وعمار كيجاب (ودي نخليها للحاج لأنو اسماعيل ماكان مولود) ... اما المهدد التالت كان يتمثل في مرور زول كبير من الحلة ... وهذه كنا نعالجها بالاختفاء وسط النال وفرض صمت رهيب الا ان تمر هذه العاصفة.... اما اطرف التهديدات كانت تتمثل في كيفية اخفاء آثار الجريمة حيث كان الاصل ان يكون الزول اغبش والعوم يطفي علينا نعومة غير معهودة وما بتشبهنا ... اها دي يحلوها كيف كمان ؟؟؟... بسيطة كنا بعد ما نعمل عملتنا نضع ايدينا في التراب ونمسح بيها وشنا ولكي نطمئن اكتر ينظر احدنا للآخر ويقول له عبارة صارت اثرية (العوم ظاهر فيني؟)

لكن بعد كل هذا السرد لم اجد مبررا يمنع العوم لأن السباحة هذه من الاشياء التي وصى بها الاسلام .. كما ان المبررات التي كانت تقال حينها لم يكن لها اساس منها العوم بجيب السحائى والعسكري بيقبضكم وغيرها

(عليكم الله لو في زول عارف ليهو مبرر منطقى لمنع العوم يكتب لينا؟؟؟)

خارج النص

وانا اهم بارسال الموضوع للمنتدى اتصل بي الاخ حاتم سعد مشيدا بمساهماتي في المنتدى وناقلا خبرا سارا باكتمال اجراءاته الخاصة بالجنسية وواعدا رواد المنتدى باكمال رواية عمشيقة واضافات اخرى

اولا التهنئة الحارة للاخ حاتم بالجنسية الف الف مبروك ... اما حكاية منع العوم فى الحفير دى فالمنع ثلاثي المواقع العسكرى والخوف منه ثم الراجل اليخوف لانه فى واحد اي كلام وثالثا وسخ الهدوم والعيون الحمراء وناس البيت يعرفوك عمت فى الحفير .. لذلك عوم الحفير ممنوع استنتاج انا اراه ذاتى ولا شنو جنابو كمال والله بينى وبينك كانت ايام لن تتكرر مع التقنيات والتقلبات الحاصلة دى ... وربما غيرى يرى غير ماارى .. شكرا كمال ودمت فووووووق ....

عووووم الحفير ممنوع ,, ماتمشو الحفير
واظرف حاجة انو بعد ماتعوم يجى زول يشيل الهدوم
وبخليك تتلبت وراء النخيل حتى تصل للبيت ,,,, والجماعة يلمو فيك ويدوك جنس دقة؟؟؟؟؟؟؟؟؟

ايضا اخى العزيز نحن عايشنا نفس الظروف وكان مسرح الاحداث بالنسبة لنا كبرى سيدى الحوش لقربنا جغرافيا منه وكما هو معلوم
كبرى سيدى الحوش يقع مباشرة بعد كبرى الانتنى - لك التحية 0

السلام عليكم ورحمة الله
العسكري دي من زمن الانجليز وكانو بيصرفو ليهم اللبس وهو كاكي رداء وقميص والحذاء بوت اذا نظفت الطين الفيهو يعمل ليك حبة بلك واذا صرفو ليك واحد زيو بكرة حتقدم استقالتك . أما العهدة ما كانت مسدس وإنما هي صفارة كبيـرة من المعدن وكانت هي وسيلة الاتصال مع المزارعين ..
بانسبة الى العوم فا لمسألة كانت ممرحلة تبداء من الجدول وبعدها نتصعد الى ترعة ود زيادة ودي فيها قصيدة للسباح العالمي كيجاب مطلعها .. غرقتي الناس بالمخاضه .. ياتريعة ودزيادة
اربعة قلبو الشهـــــــادة.. ياتريعة ودزيادة
تسلم ايــدك يامرســي .. ياتريعة ودزيادة
بعدها تصعد الى الحفير وتكون اتعلمت فيها الرك .وبعدها الى الترعة المربعة وهنك مافي حد بيسألك لانها شبة عامة ومنها الى البحر البشيل عوامو ... شكــراً سيـــادتك

والله زمن جميل واضيف اشهر العساكر وهم عساكر ياكمال بالمعاش ومنهم من درب الريس جعفر نمير المرحوم عبدالغني وكان اكثر واحد فيهم مخيف ولايجامل العم حسين طلب وكلهم كانو مخلصين في عملهم لهم الرحمه والمغفره الاعمام صديق سعد وعبد اللحفيظ سعيد وعبالرحيم هارون الاخ___________ العقد الفريدوخلف من بعدهم خلفا تركو الناس يسرحو ويمرحو في الحفير زي مادايرين لامن مسخ العوم في الحفير زي كل شي مسيخ اليوم في الغابه اخيرا ياحليل زمان وايام زمان لك التحيه الاخ كمال

اسي يعني الموضوع دة معنااهو خليك برة الصورة خلي الكباار يتكلموو يعني شبية بي اصقر شاافع الاخوان الكباار
يسلموهو الهدووم ويقولو ليهوو خليك جم الكبري لما تشوف يحي المحسي ولا عبد شامة ولاالبقاري شيل الهدوم واشرد ارجنا جم الزقاق الجم البيت هههههه

من لم يعوووووووووم في الحفير ليس منا ...

ايام يا زمن ,طيب الرعب بالنقابلو فى العوم من العساكر وبعض الشخصيات فى الحله زى عباس بابكر رحمه الله, وده بديهى خايفين علينا من السحائى والامراض اما العساكر ماعارف خايفين من شنو احتمال نعكر ليهم المويه وتمشى ليناس جبرونه وحلة ودستناناقصه ووسخانه تب.
تخريمه واحد من العساكر كان حازم واضانه تقيله لقا المويه فاتحه وضرب صفارته المزارع جا وحاول يبرر موقفه وفشل مع العسكرى الجاد وبعدين طلع 5جنيه رشوه وبس القيامه قامت ترشينى انا اخر الزمن وعمك المرحوم حسن كيرى وهو كان رجل مشهور بالدهاء وسرعة البديهه سمع الحاصل وتدخل قائلا يا فلان انت اظاهر سمع تقيل الزول ده قال ليك فكليهو ال5جنيه ده, كدى معليش والله سمعت غلط, وتم انقاذ المزارع من غرق الحفير .