تمساح بروس الغلب أبنعوف.....

-الولاية الشمالية ودود ولود حلوب،أنجبت العديد من الشخصيات
التى أثرت فى مجتمع المنطقة كل بما حباه الله فى مجاله
ودعونى أبدأ لكم بأبنعوف صائد التماسيح:
على امتداد خارطة الولاية الشمالية ،لم يحظ انسان طيلة القرن الماضى بما حظى به
أبنعوف محمد حمد من صيت وشهرة ،ومع ان اسم (أبنعوف) من الأسماء المتداولة فى دار شايق
الا أن البطل أبنعوف ولد وترعرع فى قرية (سورى) شمال مدينة القولد.

ومهارته التى لا مثيل لها فى اصطياد التماسيح هى التى ساقت اليه الصيت والشهرة،
مثلا عندما أقلق تمساح عشارى مضاجع المواطنين فى منطقة الحامداب جنوب مدينة مروى
وأعيتهم الحيلة استعانوا بأبنعوف فقنص له بسلاحه(المارتين) فأرداه قتيلا:
يا مسيك الضربو ابنعوف
ضربو موزون بين الكتوف
ضربو بالمارتين اب ضلوف
طمن الحامداب من الخوف
مسيك:تصغير لكلمة مسك(العطر) .
وفى جزيرة بروس مسقط رأسى تتغنى الفتيات للعريس ليلة الحنة قائلات:
تمساح راس بروس
القلبو خاتى الخوف
الغلب ابنعوف وحجر الجروف
وفى مرحلة الطفولة كنت وأقرانى مغرمين باصطياد الطيور
وكثيرا ما كانت تمر بنا امرأة تدعى عاشة امين تسخر منا قائلة:
الرجال كتلوا للطويرات حتحتوا الريش
وابنعوف كتل العشارى المردغ الديس
ودوما كان ابنعوف محط انظار واعجاب الحسناوات ،
وذلك لأنه فارس لا يشق له غبار وشاعر متبتل فى محراب الجمال:
يا فريع السلمة الرقيق
ما بيشيل قمريتين طبيق
واى انا الداخلى فى ضيق
حارة نار الغى يا رفيق
وفى رائعة أخرى يقول:
البنات اللتنين سوا
واحدة للمرضانين دوا
والتانية عجوة من غير نوى
وفى رائعة ثالثة يقول:
يالبينة الصيف الحليب
المنضفة من السبيب
والمعلقة فى الهمبريب
ان كان شربتك خاطرى بيطيب
ولا ينسى أبنعوف ان يحكى لنا عن رحلاته النيلية
على متن مركبه الشراعية:
والسموم تلفح يا لطيف
والشمس فى عزة الصيف
مرة أمشى ومرات أقيف
=============
ومرة كاسح ومرة منجر
لا قرار لادكشة حجر
فى رعاية التور كندمر
كندمر:هو محمد عبد الماجد جد الغبش بغرب بربر
ويقال أنه من أولياء الله الصالحين ويوجد مقامه فى جزيرة تنقسى.
وكان ابنعوف شديد الاعتداد ببطولاته وخاصة مغامراته فى اصطياد التماسيح:
مانى حوات فى التريعات
ومانى قباض لأم دريقات
بقيض الفى ضنبو عاجات
مسكو يفتخرنبو البنات
وقد انتقل الى رحمة مولاه فى العام 1956.

ياحليل زمن الناس الكانت بتصارع التماسيــــــح....{منقووووول..}

التحية لك العملاق فيصل ترنتى..على هذا الكلام الطيب...إنت حاتخلينى ..أخش البحر وأقبض ليكم تمساح بروس الغلب أبنعوف...طبعا"عارف الجعليين لما يقوموا.....ههههه

نسيت يافيصل موضوعنا ولا التماسيح دى أرعبتك...ونستك الموضوع..تشكراتى وتحياتى مره أخرى ترنتى ..وعاوزين برضو نعرف تسميه ترنتى دى من وين والسبب شنو..

أما سؤالك عن تسميه عاصى القيد...هى فى الأصل الأسم كان عاصى القد ...ودو الجلد القوى...القد معناه الجلد...والوالد لما درس فى الازهر المصريين أضافوا ليهوا الياء

وأصبح عاصى القيد ...ويافيصل النداء التانى نزل لينا صوره ترنتى الحكم زمان....ههه

تحياتى للحبيب أبوحميد ومبروك التميز يامتميز وعقبال القلم الذهبى والذى ستناله قريباً يامتميز...تشكر على المرور والتعقيب...وكندمر ده حاتفرد ليهو موضوع قريباً ....إنشاء الله

القلوب لبعضيها وكلنا إخوه نبضنا وآحد....تشكراتى ياكيمو...والوآلد عنده تسجيل بتلفزيون السودان قام به نفر طيب بقيادة الأخ جدو...وسيرى النور قريبأً سيعلن عنه

جدو فى المنتدى...وآهو غيرنا الخط من الاندلسى للديوانى عشان العيون تستريح ....تحياتى..

تحياتى أخى الصادق...التماسيح النيليه..وهذه آكلة لحوم البشر ...والتماسيح البشريه آكله حقوق البشر..لكن كدى خلينا شويه مع عمنا أبنعوف..

طبعاً سمعت بى قصصه وحكاياته.....كلمنا عنه شويه....

يديك العافيه حبيبنا الصادق...تشكر على المعلومه..وأعمل حسابك من تماسيح السيرك....