انا بكره اليوم الصنع قلبا يكورك ويندهك
انا بكره الوطن البلّم شرف الغرام المنتهك
من ياتو باب طليت علي ما كنت اصلاً بشبهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك بابالضلوع
شديت رحالاتي ومشيت وكتين هتك حيلك هواي
إرتحت في موجي ورسيت
لاحرك الموج البحر لا صد قلبي ولا قسيت
لكن طلعت خيال عشم
ضمخ رؤى الوجع ا لمميت
انا بكرهك
قدر اشتهاي انا بكرهك
قدر الغرام الكان زمان كابت مساماتي وهواي
انا بكرهك قدر إني ما لوثت بيك كريات شراييني ودماي
انابكرهك قدر اني غنيتك غناي
من وين دخلت علي مدن شاخت من الوجع الأليم
من وين طرقت جدار قلب لقح هوى العشق العقيم
من وين سخت شمسك علي كانت سماي مليانة غيم
فتق جراحاتي وامش خليني في لهب الجحيم
اناقلت ليك انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هواي هو اريتو كان سويتلو سوق
انا بكرهك
قدر المواسم الشادة خيل الريد عليك انا بكرهك
قدرالمصائب الحارسة بوابات مجيك انا بكرهك
نفس المساحة وحجم قلبي الكان تملي بيشتهيك
بقى بكرهك
وإتوكل ارحل مني فوت حرمان علي قلبي الكلام
كان غيرك يجتاحو السكوت
خليهو قلبي الاندفن تنسج عليه العنكبوت
اوخلي من بعدك أموت
دا الموت اخير من اني افضل في رحابك وفي رجاك
انا كنت لو غاب القمر دائما بضوي ضلام دُناك
وانا كنت لو غيمك رحل بطلع عشان أسكن سماك
وانا كنت لو بردك نزل بوقد صوابعي لهب حداك
لكن منو القدركدة
والله لو انا في محلك بنسج الشمس احترام واهديها ليك متمددة
بفتح كراريس الكلام أختار حروفي وأجردا
بنبش قبور المستحيل كلمات شكرمتفردة
لكن خسارة على قلب حباك بلا ما يعرفك
انعل ابو القلم العلي دفترغناك دمو انسفك
انعل ابو الشعر الغشاني وغنى فيك وألفك
منعول غناي لو ما إمتطيت خيلي وبقيت اتأسفك
بتاسفك وكتين عيوني بسوقن الشوق لإنتظارك
لما ليلي يسوق محاسنو وينهزم عندك نهارك
لما ابكي إنهزامي عشان أبارك إنتصارك
لما كوكبي ساب مدارو ورحل عشان يسكن مدارك
كنت مالي زمان ومالك بس وحاتك بكرهك
ندمان على عمراً معاك ضيعتو في غفلة زمن
ندمان علي دمعاً سكبتو على رضاك وبلا تمن
انا كنت بحلم في وجودك ينكسر خاطر الشجن
لكن رضاي عليك عشم إبليس قصاد جنة عدن
وانا بكرهك
كل مايطول ليلي ويواتيه العذاب انا بكرهك
كل ما القلم يركب مصاعب الدنيا يمشي على الكتاب
انا بكرهك
كل ما الفراق كتّل مضامين العشق سدالو باب
انابكرهك
قدر العيون ما تلبس التوب الزراق تتوضأ موية الانتحاب
انابكرهك من كل باب انا بكره
وإتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك بس كنت ناوي اجملك
وامسك مضامين اللغات من فيض حروفي أكملك
ترحل علي درب العشم بي زاد هواي احملك
وكتين يخش قلبك جراح اقطع قليبي وأدملك
ندمان منو..انا غايتو ما ندمان عليك
إتوكل أرحل من جواي عيش العذاب الباقي فيك
ولو قلبك اتجرأ رجع حقك تلومو علي مجيك
شان قلبي انت مليتو دم ما عادلو باقي يسيبو ليك
على كل حال انا بكرهك
عدد الحصى وعدد الرمال انا بكرهك
عدد الصواب والاحتمال انا بكرهك
عدد الحقائق والخيال انا بكرهك
عد الشنة وعددالجمال انا بكرهك
عدد الاجابات والسؤال انا ابكرهك
عدد الشعر ماسنة سيف الارتجال انا بكرهك
عدد الممكن والمحال انا بكرهك
عدد ما زمان قت ليك تعال انا بكرهك
مستورة حالي وراك وفوت
يا دابو ليلك همو طال
على كل حال انابكرهك
الرئيسية
