هكذا قال ظرفاء الغابة

نال الاستهبال عثمان الاسيد حظا وافرا ( أقصد موضوع استهبال عثمان الأسيد)
ما رأيكم من تعميم الاستهبلات وأنا أجمّلها شوية وأسميها الظُرف
الغابة مليئة بالمستهبلين الظرفاء الذين لا تمل الجلوس معهم أبدا من أبقسى لغاية سلنارتي
والكلمات التي يطلقونها من حين لآخر نتداولها جيلا بعد جيل
الهادي عبد الحي ابن عمنا نال الظرف حظا وعباراته المضحكة دائما تتناقله الألسن
قلوا ليه : علي انبانا عمل كمينة 300 الف طوبة
قال : ياخي دي أصلها كمينة نوح

المرحوم عمنا زيادة النور ( جعل الله مثواه الجنة ) يعتبر من أظرف الظرفاء بالباجا وحاضر البديهة وردوا جاهز دائماً وما بتلفت زي ما بقولــــــوا وما أطول عليكم واجدع ليكم شوية من قفشاته:
1- تاية رمضان (ويا حليل تاية رمضان ) كانت التاية حقت شراب الموية في رمضان بتاعت تحت السبيل فيها عدد كبير جداً من الأطفال فأول ما يأذن يدنقرور الشُفع ديل في الأكل ويجدعوا الصينية الفاضية وراهم ويزحوا لي قدام وأغلبهم طبعاً عساسق شيخ محمد فيقوم حاج زيادة بإطلاق نكته حتى يكبح جماحهم ويكفوا عن الأكل فيقول عساسق شمحُمد زي البُرقُدى .....تعرفوا البرقدى
2- تعودنا بعد صلاة الجمعة بمسجد الباجا قُبلي يقيف واحد ويلخص الخطبة وما حوته من دروس وعبر{ فقام الأستاذ عسكر وقال جزا الله الإمام خيراً لم يترك شاردة ولا واردة إلا وأحصاها .... طوالى عمنا زيادة قال ليهو نان إنت ماش تقول شنو تانى ؟؟وقام مرق وضج المسجد بالضحك وارتفعت اصوات القهقه.
3- في إحدى الجمعات قام الأستاذ عبدالرحمن محجوب بقراءة بعض الروشتات الورقية من دعوات فرح والتى كانت توزع بالجوامع في ذاك الحين ومن بينها ورقة تقول سوف يصلنا وفد من منطقة كذا يطلبون دعمك لإكمال مسجدهم فقام حاج زيادة وقال والله جامع الكسيق دا أها تُب فوقوا أنا الجمعة الجاية بصلي مع الصالحين بالشرق .

مــــــــوضوع في قمة الروعه
ومن ظرفاء الغابه اخونا الياس سعيد الرجل الحكيم
كدي نجيكم بي رواقه ونشوف الذ واطرف الطرائف

الحكايه شنو ياجدو انت تضحك علينا واللا شنو كل مره تقول نجيكم بي رواقه وما نشوفك تاني اذكر انك قلت حتجيب خبر طاحونة جبرونه وبالصور - انت قايلنا كبرنا خلاص وبقينا ننسي بسرعه واللا شنو - ما تقول لي واللا شنو

Mahasin Mohamed Ali كتب:: عوضية سالم (بنت عرفة بخيت) دى كلامها العادى مضحك
في امتحان عربي فى الثانوي العالي كان السؤال ( صوري من الأبيات السابقة معركة الكرامة)
قامت رسمت ناس فى حرب شايلين السيوف والواقع في الارض ميت واخرين السيوف على رقبتهم
الاستاذ وزع الورق وهو يفطس من الضحك وسالها دا شنو؟؟؟؟؟ قالت ليهو قلتلي صوري المعركة وانا ما عندى
كاميرا رسمت ليك بي يدي أسوِّيلك شنو؟
وكمان زهور زوجة خالد زيادة دي فاتت اولاد الاسيد فى استهبالها
يوم كان معاها ضيوف وما عرفت تعمل العشاء بي شنو مشت محل العويش (الواقود)وقامت تصرخ باعلى صوتها
العقرب لدغتني وتصرخ ربطوا ليها يدها وهاك يا ليمون وهاك يا نعناع واتلموا الجيران وبعداك كل واحد يا ولد امشى
جيب العشاء وعشوا الضيوف (ولا عقرب لدغتها لا شئ)

هههههههه...

وداعه السيد...رحمه الله ..زارنا مره فى البيت وعند خروجه من البيت ذكره الوآلد بأنه لم ياخذ الليمون الذى قام

بجمعه من الشجره ...نسيت الليمون ياوداعه ....رد وداعه بظرافته المعهوده ...{الليمون مجننا فى البيت } خليهو

المره الجايه بجى بشيلو .{..زوجته إسمها ليمونــــــــــه....}

هكذا قال ظرفاء الغابة 405e316cfc

كمينة نوح
مسجد الكسيق
عقرب بت بخيت
ليمون وداعة .... كلها تصلح عناوين لمسرحيات كوميدية رائعة ..والله ضحكت ضحك

شكراً الصادق أبو

وجاييكم بمحن الكواجيب ..بس بالجد جد يا محمد أفندى ماذى ود عمك Very Happy

mohmdalsheikh كتب:: الحكايه شنو ياجدو انت تضحك علينا واللا شنو كل مره تقول نجيكم بي رواقه وما نشوفك تاني اذكر انك قلت حتجيب خبر طاحونة جبرونه وبالصور - انت قايلنا كبرنا خلاص وبقينا ننسي بسرعه واللا شنو - ما تقول لي واللا شنو

والله ياعم كل يوم اتجول بداخل المنتدي ولكن لااعرف من السبب لا استطيع الكتابه الا في اوقات تاتي دون مقدمات يعني كتابتي بالمزاج هاهاها
والطاحونه جايه جايه

http://t2.gstatic.com/images?q=tbn:ANd9GcQxxTbZ4wNUoeb75DIirPnJto-L--jpAG1h0GGXJSjNfYFbyYEziA ( جدو لا زلنا في انتظار الطاحونه )

الطاحونة الجايبنه ده البدوره ليكم منو

بعدين هى كهربة والله بالمنفلة

حوض التبريد انشاءالله جاهز ومليان

اهلا أخونا العزيز محمد ميرغني هي الطاحونه مذكر ام مؤنس أنا معترف بدنقلاويتي ولا اعتراض لي علي مخاطبتك الطاحونه بصيغة المذكر - بمناسبة المنفله أنا اول عربه استعملتها في الستينات في الابيض كان كومر يدور بالمنفله طبعا الواحد ما شاء الله كان مفتول العضلات وكان الامر عادي جداً الا ليت الشباب يعود يوما لأخبره بما فعلت بنا عربات هذه الايام التي تشغلها وانت علي بعد أمتار منها

الصادق ابو حسن كتب:

الطاحونة وصلت وكمان ربطوها وشايف الصادق شادى السير وحجر الطاحونة مدقوق عشان الدقيق ما يبقى دراش

mohmdalsheikh كتب:

اهلا أخونا العزيز محمد ميرغني هي الطاحونه مذكر ام مؤنس أنا معترف بدنقلاويتي ولا اعتراض لي علي مخاطبتك الطاحونه بصيغة المذكر - بمناسبة المنفله أنا اول عربه استعملتها في الستينات في الابيض كان كومر يدور بالمنفله طبعا الواحد ما شاء الله كان مفتول العضلات وكان الامر عادي جداً الا ليت الشباب يعود يوما لأخبره بما فعلت بنا عربات هذه الايام التي تشغلها وانت علي بعد أمتار منها

الطاحونة مؤنث ومذكر وبعدبن انحنا جايين من الصين(حلوة دى) اهلنا الكبار كل اللغات شى دنقلاوى شى محسى شى شايقى

والدنا عليه الرحمة كان يجيدها والوالدة كانت تفهم المعنى(ديل ناس تنقسى)

الابيض دى الوداك هناك شنو

الابيض وداني ليها اكل العيش اقصد اكل القراصه -جارين وراء اكل العيش ما خلينا بلد حتي جوبا وصلناها كان ذلك عام 1968 لحسن الحظ سلفا ابو سفه كان محشور في الأدغال والان هو في هجليج -مسخرة اخر الزمن

mohmdalsheikh كتب:: الابيض وداني ليها اكل العيش اقصد اكل القراصه -جارين وراء اكل العيش ما خلينا بلد حتي جوبا وصلناها كان ذلك عام 1968 لحسن الحظ سلفا ابو سفه كان محشور في الأدغال والان هو في هجليج -مسخرة اخر الزمن

السودان زمان كان ليه نكهة زمن السفر بالقطار ( القطر ) و التصاريح ( التساريح)
نركب البيصابق الريح
نمشي في الخرتوم نستريح
الخدامة تسوي التبيخ
وكل جمعة نزور الضريح
بلالي بتين يجي؟
مجرد تفكر في سفرة للخرطوم تختار ليه اليوم الشهر الجاي او بعد الجاي او بعد قلع البصل او حش الفول نبيع التور
الان ، بعد ما تصل الخرطوم تكون يا داب فكرت في السفر وانت جاي الخرطوم ليه
اما ناس الابيض وكسلا تفكر في زيارة مدينة ديزني ولا تفكر فيها
لكن يا باشا جوبا دي سمعت بيها كيف؟

طبعا يا ولدنا الصادق في جوبا كنا من كبار الموظفين وكان بيدونا اللبن والبيض ببلاش والخروف بخمسين قرش اي والله بي خمسين قرش - ارجودكم ما تذكروني بايام زمان احسن الواحد يجبه اكتئاب

» ظرفاء المدينه
» هكذا كان اللقاء.......
» الغابة دوت كوم
» هكذا كنا فمتى نعود؟؟ -1-
» هكذا .. الحــياة ونحـن دوماً ...