(مدخل):
بعدي بدعيلك تعيشي
راضية وبالجديد تتهني
كل الأماني الطيبة ليكي
فرحك يزيد يحصد يجني
وإن كمل فرحك تعالي
شيلي باقي أفراحي مني
هاكي وعدي أنا يوم زفافك
تلقيني أول من يهني
@
(النص):
جوابك ياحبيبة وصل
قريت كل الكتبتيهو
معاناة وآه وشدة شوق
عذاب بيقطعك بيهو
تبرري في الحصل منك
وشايف دمعتك فيهو
قليبك بالفراق شقيان
وراجي قليبي يشفيهو
كتبتي وقولتلي دربك
بلاي ما أظن بتمشيهو
وكلامك كلو كان أوجاع
تبكي قليبي تنفيهو
وآخر كلمة قولتيها
تعال لي قلبي دوايهو
@@@
دحين هاكي الجواب أقري
وليكي تحية وألف سلام
سلام من زول بريدك حق
بدونك ما غشاهو منام
سلام من زول عيونو بكت
بتشكي حقارة الأيام
سلام من زول طلب عدلك
حكمتي عليهو بالإعدام
سلام من زول صبر هجرك
وراضي تكفتو الأقسام
@@
بعد تسليمي هاكي الرد
حروفو ملخبطات بدموع
دموع تشرح عذابي البي
تقولك ماني حمل رجوع
تأكدلك غرامك حي
ولايوم شاف عطش لاجوع
توريك إيه مدى إحساسي
بحسك شهقة تحيي ضلوع
وماكي براكي موجوعة
أنا الأكتر بشر موجوع
@@
بحنس في عذابي أمرق
حلف قالليا مامارق
تصيح أوجاعي للنجدة
بتشبه صرخة الغارق
أوعك بس تفكري يوم
بعادك فيني مافارق
بعادك هز فيني كيان
بعادك والله نار حارق
@@
قدر إيش تاني بتكلم
وأقول والله حبيتك
وماخونتك ولا ف بعدك
وذكرى جوايا ختيتك
وهسع هاكي كل فرحي
عساهو يكون عمار بيتك
وإلا رجوعي مامكن
وآسف إني صديتك
@@
وآخر حاجة ليك عذري
تسطر ليك حروفو دماي
مناي ترتاحي في دنياكي
برضى عذابي في دنياي
وأرجوك بس دموعك لا
دموعك حرقتي ومأساي
وغافر لك عذابي الكان
وغافرلك عذابي الجاي
الرئيسية
