لبيــك عثمان الشخ الاسيد/ الفصل الرابـــــــــــع

الحكايه : الحسن ود زينب
الفصل الرابع
فطير مترع بالحليب... طبق مألوف وطعم غير مألوف...قلق ترقب حيره خوف على من تحب مراره حلق تفسد المَنٌ والسلوى و الحليب .. تبين للنور إستحاله تناول طبقه المحبوب . نادى إبنه خوجلى فى صوت كأنه يصعد من قعر بئر مهجوره :
- ياولد شيل الصينيه و خلى أختك تعمل شاى ساده
=ابوى الشاى مابنفع معاك !
- أستغفر الله.... من أمبارح المابنفع معاى وبلعتو كتير جيب الشاى ...
= حاضر... يابوى عمتى حسُونه وخالتى الطاعم عايزينك بى هناك !
- الحمد لله... قولهن تعالن بى جاى
أختفى خوجلى و العشاء المهجور ..
والنور فى انتظار من حمد الله على وجودهن بالمنزل . إنهن افضل من يشورهن . فالطاعم خالة زينب... صفاء قلب وحلو حديث .. لُقبت بالطاعم من صغرها اغلب الاهل لا يعرفون أسمها ست النسا . احتضنت اولاد اختها ست البنات كأم بعد الوفاه 1975م ...
حاولت الطاعم كثيرا لم شمل زينب والعبيد (شان خاطر الحسن ما يتقسم بين دارين ويتحرق فى نارين ..) العبيد يحترمها و يعزها ولكن جهودها الناعمة تتلاشى بسهوله فى دوامة عنف وخبث الساره والشام .
-النور اخوى كيف حالك إنشالله ماك ميرود متين بترجع الفطير باللبن... إنشالله ماعندك عوجة!
تجاهل حديث حسُونه عن العشاء مادا يده للطاعم مرحبا واجلسها بجواره على السرير وهو يقول:
- لو قايلكن قاعدات بى هناك كنت اتعشيت ... عينك إنشاء طابت يالطاعم .
=والله القطرة نفعتنى تب والحمد لله الحَمَار راح لكن كنت محتاجالو مع بتك زينب ... القرايه الكتيره ودرت ليها راسه تب ...!
- الطاعم منو الشاف ليك عين حمره ..! زى ابوكى ... ما حصل غلبتو مشكله بين طرفين كان بقول : ( لو الكلمه الطيبه فشلت الاطيب منها ما بتفشل )!... ابوكى كان مجلس رحمه وخير للطرفين وللبلد كلها ... اللهم ارحمهم جميعا .
= الله يرحمهم ويحسن اليهم ... يالنور اخوى صلى على النبى ..
- عليه الصلاة والسلام .
= زينب لازم تتزوج ... والحسن كبر لكن محتاج أخوان وأولاد الساره ماببقولو ليهو اخوان وإنت عارف ..
- والله المسخ العشاء الموضوع ده..! فى المستشفى العبيد طلب زينب ترجع شان الولد يرجع لى حضن امو وزينب ترجع لى بيتها .... وشان خاطر الحسن امشى يالطاعم وشاوريها إن وافقت بكرة بعقد ليها ... قومى خلصى الموضوع العبيد راجى الرد بكره.
- انشالله خير ربنا يهديها تقول خير خرجت الطاعم وإلتفت النور الى اخته .....
= حسُونه مالك ساكته...!
- النور .. زينب ما بترجع للعبيد ..العبيد زى ابليس مرق من الجنه وما برجع تانى انتو تعبانين ساكت . دحين انت الظابط ماجاب ليك خبر عن الحسن...! شرب الشاى ومرق بى صمة خشمو !
= لالا ما مرق بى صمة خشموا...
وفى إنتظار الطاعم يمنى نفسه ان ترفض زينب العبيد .. أخلاقيا لا يريد أن يؤثر على قرارها لكنه على يقين أنها سوف تتخذه وفى قلبها الحسن لا العبيد !.
الدقائق بطيئه مؤلمه خشنه على صدره كزجاج مجروش ..!.
عشره دقائق والطاعم تعود وبيدها صينية الشاى وأساريرها لا تفضح سرها...فهى مبتسمه بشوشه فى احلك الظروف ... تتناول حسُونه الصينيه من يدها , لم يرى النور الشاى فقد كان يقرأ قسمات الطاعم عسى ولعل !
( اللهم صلى وسلم على النبى المختار ..)
- النور اخوى.. البت بتقول ليك : ( الولد ساب البلد ماساب حضن امو وبالنسبه ليها الدار ما جدار.. الدار يانور يا نار .. ومع العبيد تب ماعندها مسدار .. ومافى ضُلن يلمهم .. وهى عايزه تخدم ولدها فى الخرطوم عشان يكمل تعليمو ..)
ترجل جبل ست عاشه عن رأسه واتسعت حدقتا عينيه فمد يده لكوب الشاى مرددا فى سره الحمدلله الحمد لله ........!
توقفت عربه بالخارج و صوت عدد من الرجال يتسور حائط الصرايه ويقتحم أذن الجالسين أسرع خوجلى فى فرح متجها ناحية الباب
- ابوى ديل ناس جدى الشازلى ..
وقف النور والطاعم وحسُونه لاستقبال عمهم الشازلى و التيمان حمزة وعباس وبعد عناق حار وفرحة طردت كآبه خيمت على الدار منذ الامس...
- النور شنو الاخبار المزعجه دى كيف الحسن يمرق من البلد وما يكلم ابوه صحى أنت عارف وساكت ..؟!
= اجلس ياعمى والله جيتك دى جيت خير ... خوجلى جيب العشا أنا ذاتى جعان وشيل الشاى مانى دايرو ... رايكم شنو فطير بالحليب!
- جيب الجاهز ... وبسرعه ورينى الحاصل نحنا متفقين مع الطاهر يرجعنا بالليل وهسع هو مُصنقر فى المعديه راجينا
( إنطلق خوجلى والتيمان الى زينب وبعد السلام شرعوا جميعا فى اعداد العشاء )
الشازلى ملوحا بعصاته
= الطاعم وحسُونه انتن عارفاتن الولد مسافر بالطريقه دى وعارفين إنو ما شاف بحرى من الباجا ولا قبلى من القرز ويمرق بالليل براهو ويسافر للخرطوم ؟!
ردت الطاعم وهى تقترب خطوتين :
- والله ياحاج الشازلى ما عرفنا إلا بعد حاج العبيد نقلوه للدكتور يعنى الضُهريه ! وبعد ما شفنا زينب عرفنا انو الموضوع مدروس مرتب ...
= فى الحقيقه ياعمى... الولد كان عايز يكلم ابوه شان يكمل دراسة الجامعه لكن عرف انو الساره اقنعت العبيد انو الحسن مايسافر شان محتاجين ليهو فى الحواشه وقال لوكلمتو ورفض تانى ما بقدر أخالفو واحسن أسافر وبعدين لمن الامور تترتب أرجع أستسمحو.. والولد اموره مرتبه فى الخرطوم ...!
- طيب العبيد طلب يرجع زينب وقال انك شايل منو كتير وخايف تعصيها وجاب سيرة الطاعم محضر خير ....
= الله يشهد بلغتها وانا بعيد حتى وشى ماشافتو اهى الطاعم تخبرك ..!
- والله يا عمى الشازلى أنا من زمان بحاول ...قبل سفر الحسن صحيح العبيد ما قال خير لكن هى كانت رافضه أكتر منو... والآن مافى اى فرصه واحسن تبعد من درب الساره والشام ... أستغفر الله يا الحاج بعد السمعتوا اليومين ديل .. أستغفر الله استغفر الله لو ماتت واحدة منهن التانيه ماعندها فى البلد لا صاحب لا صليح...!
= لاحول ولا قوة إلا بالله يعنى حتقولو ليه المره ماعايزاك عشان اختك ومرتك .. دا كلام شنو يالنور ... لو بقدر يوفر ليها البيت الشرعى ويحترمه ما احسن يرعى جناهو ..
- الشازلى عمى أسمعنى كدى .. اول شى الود بقى راجل... وزمن كان محتاج لى ابوه كان الاب لاهى ومشغول وماعارف عندو ولد اسمو الحسن .. عندو تربال أجرتو نص صحن قراصه بلا كباية شاى .
= كفاية يالنور تقصير الوالد ما بحلل عقوق الولد .. بعدين الابو قال غلطت وندمان كفايه... وربنا يمكن عايز يعوض الولد على الصبر والطاعه ماتحرموه اجر كبير أكرمو بيهو الله ..!
- الولد مافى زول عصاهو وبرجع انشاالله لكن زينب ادخل شاوره تانى .
= قومى معاى ياحسُونه شان تجهزى العشا وأنا بتكلم مع زينب ...
بعدما تجاوزا الباب الفاصل بين الحوشين
= زينب .. زينب .. يا أم الحسن !! تعالى جاى خلى عمتك تسوى العشا
_ أهلا جدى الشازلى انشاالله طيب طولت مننا تجى السوق وترجع وما نشوفك ؟؟
= لا لا والله ماحصل يا بتى جيت السوق وما غشيتكم كدى تعالى اقعدى هنا عندى كلمتين
- حاضر جدى .. جلست طرف العنقريب تردد فى سرها ( اللهم لا يكون إلا ما هو خير للحسن ، اللهم أحفظو وعوضو كل فرشن خشن ، وكل اكلن مسيخ ، وبعد الهمله المهله فى الرزق والصحه والعافيه والعلم أنا عافيه وراضيه منو يارب )
جدها يسرف فى الحديث وهى تسرف فى الدعاء سرا للحسن لم تنتبه إلا بعد أن امسك بيدها وقال لها:
- اسمعى الكلام الفارغ كوم ومصلحة الحسن كوم تانى ... أنت صبرتى ولدك صبر وما تخسرو النهايه..! يمكن ربنا نور بصيرتو وعزم يصحح الفات ... الله بهدى و بيغفر وبرحم .. قولى خير نبيت هنا وبكره نكمل كل شى وترجعى بيتك معززة مكرمه قولى خير يابتى .!
= والله ياجدى أنا ما عايزة إلا الخير . لكن رجوعى للعبيد تب ما فيهو خير ... ياجدى صلى الصبح وشرب الشاى ولبس هدوم السوق .. قال لى اقعدى عندى معاك كلمه ... استغفر الله .. كنت فاكره عايز يشكرنى على السويتو فى عرس الساره... يا جدى انا قسمتة الحلاوة بيدى وزغردت ليهو ولومت الما بارك لينا رغم أنو حتى اللحظه ديك ما شاورنى ولا قال لى بدور اتجوز سمعته يوم العقد من اخواتى سمعن فى الشارع النسوان بيتكلمن .. قال لى اقعدى قعدت وقلت ليهو انشالله خير يا ابو الحسن قال لى خير : الحسن سجلتو فى المدرسه وإنتى بدور ارمى حبلك جهزى اغراضك عشان تمشى لى بيتك ورقتك بتصلك فى البيت . يا جدى أنا أصلا ميته حتدفنونى يوم ارجع للعبيد .. عشره سنه بصلى وادعى يارب تبعدنى وجناى من بلد فيها العبيد ما يكون بينى وبينو قوز رمله بس... تكون بينى وبينو جبال وتلال وبحار وبلاد ... والله لو ما اخاف اكسر خاطر اهلى كنت فزيت زمان من البلد .. يا جدى سألتك بى الله أنا زى بناتك لو لازم ابوى يزوجنى قبل ما يسافر قول ليهو أى راجل أنا موافقه لا بسأل عن أسمو ولا جنسو ولا تعليمو ولا عمره ولا مالو إكان متجوز تلاته انا ماعندى مانع... ياجدى إنشا الله .....و إنشالله سارح بى حمار يبيع الشرقرق وسلك العده بس ارجوك ارجوك إلا العبيد إلا العبيد ... قبل أن تنهار و تركع على الارض و تنخرط فى البكاء كان جدها الشازلى يصرخ كفايه كفايه و يشهق شهقة تكاد تذهب بروحه ويبكى بصوت عال فأسرع اليه خوجلى والتيمان وحسُونه جلست على الارض تحاول أن ترفع زينب ضمتها اليها وهى تبكى بصوت اعلى منها . استند الشازلى على كتف خوجلى وهو ينهض من العنقريب ويردد:
- أستغفر الله لا حول ولا قوة إلا بالله ... ربنا يغفر لينا يابتى نحن ما جايبين خبر تتعذبو فى صمت ونحن قايلين نفسنا راعينكم ومحافظين عليكم ....إجتاز الشاذلى الباب الفاصل مستندا على كتف خوجلى ويمسك بيد عباس ...
نهض النور من مجلسه واراد ان يتقدم اليه ولكن عندما سمع نحيب عمه الشازلى انهار وجلس على السرير مره أخرى محدقا فى عمه ..سالت دموع غزيره على صدره ... هرولت الطاعم تجر ثوبها على الارض الى الداخل وعندما رأت حسُونه تجلس على الارض ورأس زينب فى حجرها صرخت
- زينب ماله يا حسُونه ... كتلنا البت ياحسُونه شن نقول لى امها فى الاخره وشن نقول للحسن فى الخرطوم يارب تلطف بيها وبينا يارب ...!
= زينب كويسه يالطاعم تعالى نرقده فى سريره تنوم للصباح واحده مننا تدعى ليها وواحده تدعى على العبيد ..!
- لالا مابندعى على زول كلنا ندعى ليها وانشاء الله نشرب الشاى من يدها
سندتها الطاعم حتى قامت حسونه من الارض ودرجنها للداخل رقدت تتمتم عايزه أخواتى يالطاعم ...
- اشربى المويه دى ونومى انا بمشى وبجيبن معاى أنا عمتك حسونه والله ما يتم شى انت ماعايزاهو على رقبتى يا زينب يا بتى...
خمسة رجال ولا حديث بعد أن ترجل جبل ست عاشه عن رأسه حمل جبال الدنيا كلها فجأه على راسة وقلبه ...نعم لماذا يبكى عمى الشازلى هكذا .. وما الذى لا أعرفه وأخبرت به جدها .. هواجس جديده تسرق مره اخرى طعم المن والسلوى والحليب ...
قطع عمه تلك الوساوس بعد أن قدم اليه التوم كوب من الماء وابريق فغسل وجهه واستغفر ملتفتا الى النور ..
= النور ... بتنا مضبوحه والله لو لا خاطر الحسن .. العبيد ما يدخل السوق تانى لا بايع لا مشترى .. مازينب أنا البرفض العبيد يخت ايدو تانى فى يدها .. وانشالله ربنا يكرمها ويختار ليها الافضل بالتستحقو ويستحقها .. يالتوم أنت وخوجلى سوق البكسى وامشى الجزيره وبيتو مع أخواتك وأمك ودغش تعالوا معاك اخواتك وامك أنا والتوم بايتين هنا وجيب لى معاك غيار .. ثم ادخل يده فى جيب العراقى وهو يردد ادى الطاهر 50 جنيه والباقى فى جيبك... هيا قومو اتعشوا بى غادى ...
نهض عباس وخوجلى وانطلق بهما البوكسى الى جزيرة حمور ...انتبه النور الى صوت البوكسى ...
= الولد مشى وين العشاء جاهز ..
- النور انت ما سامعنى بتكلم معاهم ..! عباس التوم وخوجلى مشو الجزيره والصباح انشاء الله معاهم الحاجه والبنات يفطرو مع زينب وأنا بمشى السوق من هنا ولازم زينب تعرف معاها اهل وجدها حى وشيخ التجار فى البلد ...
أحضرت حسُونه العشاء واجتهد الجميع ليشجع كل منهم الاخر ... وبعد أن غسل الجميع ايديهم وشربو بعض الماء البارد ..
- النور انا شايفك عايز تقولى شى دحين فى شيتن تانى داسو منى ..؟!
= لالا بس أمس بعد رجعت من المستشفى وانا بربط فى الحماره نزل المقدم عوض النور ودخل شرب معاى شاى المغرب وحكالى انو منقول ويوم السبت الجاى بعد اسبوع يعنى حيستلم منو ملازم اول وبرجع هو الخرطوم ...
- وإنت شن دخلك فى الموضوع !؟
= زوجته متوفيه ... وطلب يد زينب وقال عارف انها ام الحسن ... ومستنى منى رد بكره بعد السوق ..!!
- والله والله الرد ما يبيت معانا فى البيت ده حمزه يا ولد ياحمزه ..!
=نعم ابوى
- جيب عكازى دى وارح معاى القسم الميز بتاعو قُبلى القسم
= ياعمى اصبر نتكلم شويه والدنيا ليل يمكن نام واحسن نشاور البت ..
- انا شاورتها وانا ابوها وهى موافقه وانت حضر حالك العقد بكره صلاة العصر..!
= قوم أفتح الباب ياولد
بخطى هميمه وقويه ليست له قطع حاج الشازلى المسافه الرمليه بين القسم ومنزل النور .. ووقف بالباب الذى كان مشرعا
-السلام عليكم
= وعليكم السلام يالشيخ اتفضل
- بارك الله فيك بدور اقابل المقدم عوض النور أنشالله صاح !
= لو نام نصحيهو ليك اتفضل انا المقدم عوض النور..؟! إنشالله خير
- البدايه خير وانشاالله النهايه تكون خير انا عم النور وجد زينب ...!
= اهلا أهلا ياحاج ..؟
- الشازلى حميده كبير التجار ودا ولدى حمزه التوم
= اهلا وسهلا اتفضلو جوه ..
- جلسا على طقم جلوس انيق بينما احضر المقدم زجاجه الماء البارد وثلاثه اكواب زجاجيه وصب الماء وكان هو اكثرهم عطشا ورغبه فى الشرب ولكنه لم يفعل حتى شرب الحاج جرعتين ووضع الكوب فرفع المقدم كوبه وافرغه كاملا بجوفه دفعه واحده ... ثم كرر التحيه واسترخى قليلا .. فبادره الشازلى :
= انت من وين وجنسك شنو ..
- ياحاج نحن من شندى لكن مولودين وعايشين فى الخرطوم من 1920م..
= تعرف تعرف اولاد سراج الحسين
- نعم سراج الحسين الله يرحمو اخو امى ود خالته ..
= الله يرحمو أنا زرتو فى شندى سنة 68 وكان تاجر كبير ومعظم تجاره الجمال مع مصر كانت تحت يدو
- مازل اولادو يتاجرو فى الجمال ووضعهم كويس الحمد لله ..
= طيب انا جيت صدفه اليوم وقابلت ود اخوى النور وحكالى رغبتك فى الزواج من زينب وانا بعتبر نفسى ابوها وبقول ليك مبروك ولو ما عندك مانع العقد بكره بعد صلاة العصر اتصل جيب اى واحد من اهلك بكره وخير البر عاجله ..
- جزاك الله خير ياحاج اصلا ودعمى العميد خالد حسين قائد المنطقه العسكريه فى الدبه جاى السوق بكره وماعندى مانع اعقد وبعد شهر نتمم الزواج ...
= مبروك العشا بكره فى دارك بيت النور أنشاء الله
- ياحاج ما اكرمناك بى حاجه دقايق بس
= اكرمنا فى بتنا زينب وانت عارف عندها والد عمره 16 سنه .
- نعم الحسن العبيد ِوحيكِون زى اولادى من بكره هى ( أم الحسن ) كل أهلى وأنا عندنا اسمها أم الحسن .
= الحمد له الحمد لله ... إلا بدور أسألك إنت عرفتها وين ؟؟
- فى الحقيقه مرتين كُرمت بواسطة روابط طلابيه فى النادى وكنت مدعو من قبل الرابطة وسألت هل هى معلمة فأجابنى الطلاب ( بل اكثر )وسألت المعلمين فأجابنى بعضهم ( هى معلمتنا ) فرغم صغر سنها إلا ان الجميع يحترمها ويقدرها ...
= الحمد لله الذى يصرف الكون من فوق سبع سموات بيده الملك وهو على كل شىء قدير . مع السلامه موعدنا صلاة العصر فى الجامع . تصبح على خير
رجع حاج الشازلى والطاعم علمت بالخبر من النور جلست فى انتظار عمها وعندما فتح الباب التوم نهضت واسرعت نحوهم:
- شن سويت بالليل ياعمى الصباح كان خير
= الموضوع انتهى العقد بكره بعد صلاة العصر وباقى العرس بعد شهر جهزو حالكن انتن مافى ليكن نوم وانا والنور ماشين ننوم تصبحو على خير
صرخت الطاعم وهى تضع يدها على راسها (حنجنن البت ... شويه عليها واحده واحده )
التفت الشازلى قائلاوكتين تعرف زينب انو شبح العبيد انتهى حيجن العبيد ما زينب !.)
تصبحوا على خير .

ما تشيل الصينية وما تزيد إلا نكمل مخمخة ونحصلكم

فطير مترع بالحليب

رهيييييييييييييييييييييييييب

لابسين عممنا وراجين العقد

الصادق ابو حسن كتب:: لابسين عممنا وراجين العقد

والعديل والزين

اولا الشكر للصادقين ( أبو ، عدلان) وللاخ عمار

والصينيه قدح مبروك لن ينضب إن شاء الله ....

ثانيا العقد بالملابس الرسميه ( الحكايه شرطة وجيش ) والعديل والزين فيهو بطان

ثالثا نرجو من يجد ملاحظه تفيد فى تقويم مسار النص أن لا يبخل بها نرجو أن تجردوا اقلامكم لتحسين نصكم فالجميع شاركوا فى جرنا لهذه الورطة وخصوصا واحد دينكاوى اسمه ( 48 ساعه ) وابوه اسمه ( قال نسى صفر )

الحلقات القادمه فيها اسماء من الغابه خلال فتره الروايه لا تبخلوا بالنقد فصدرنا ارحب من الصحراء
الكبرى وابيض من الثلج وقلوبكم اكثر بياضا ...

هااااااااااااات ونشوف
في الإنتظار .... بشغف

الصادق عزالدين عدلان كتب:: هااااااااااااات ونشوف
في الإنتظار .... بشغف

ونخشى أن يطول الانتظار

الصادق ابو حسن كتب:

الصادق عزالدين عدلان كتب:

هااااااااااااات ونشوف
في الإنتظار .... بشغف

ونخشى أن يطول الانتظار

أرجـــــو أن لا يطول الانتظـــار وأنا أكثركم شغفا وهوسا لمعرفة الخاتمه وأحيانا أفكر فى أن ادعو الكاتب لنشر الروايه من الخاتمه الى البدايه يعنى نشر تنازلى فأن عرفت النهايه أستطيع أن اتجاهل قراءة باقى الفصـــول ...

بالمناسبه الروايه العربيه الوحيده التى كتبها الاديب الفذ عباس محمود العقاد كانت باسلوب سرد الروايه من النهايه الى البدايه ( يعنى بالمقلوب ) وأســمها ( ســاره ) ... نرجو أن يطلع عليها من أستطاع .... إنشاء الله متاوقه للفصل الاول فيها ...

لازلناااااااااااا
في الإنتظار ..........
أرسم على الحرف الحركة والجمال
ما أحسبك إلا مطوع لها

» لبيــك عثمان الشخ الاسيد ( حكاية زينب 11)
» لبيـك عثمان الشخ الاسيد ( الحكايه / الفصل الاول)
» لبيـك عثمان الشيخ الاسيد ( الحكايه / الفصل الثانى)
» لبيك عثمان الشيخ / عرض الفصل الثالث
» لبيك عثمان الشيخ / الحكايه الفصل السابع