عاش (الله جابو) صاحب 70ربيع مع زوجتة (ست الجيل بت بخيت) وهى تصغره سنأ..لكن ما عارفو كم قدر ما إجتهدت.وانتو عارفين النسوان ما بقولو الحقيقة فى العمر ودونكم قصة التلاتة حريم ركبو المواصلات والحافلة مليانة لى (عينة) فى شاب ظريف قام من المقعد وقاليهم الكبيرة فيكم تقعد هل تصدق المقعد مشى فاضى لمن آخر محطة . وهاكم دى والله حصلت لينا بالجَد جد عندنا حاجة كبيييييييرة عمره ذى 90 سنة وديناها الدكتور أول حاجة سأله قاليها عمرك كم سكتت تانى كررليها ياحاجة عمرك كم عشان نكتب الدواء قالت(والله اكان عشرين ما بعرفو). المهم نرجع لى موضوعنا أها الله جابو وست الجيل ديل عايشين طيلة عمرن ده منسترين تَب دون مشاكل اللهم إلا من وكت لى آخر كانت تحصل بيناتم بعض المشاكل ولكن سرعان ما كان يطيبو خاطر بعض ..أها فى يوم من الأيام حصلت بيناتم مشكلة ليها(ضُل) شفت كيفن ...أها الخلاف والخصام ده إستمر كم يوم وكل منهما يريد أن يكسر هذا الخصام لكن الكبرياء يمنعه من ذلك عشان ما ينظر ليه الأخر من باب الضعف وكده.. أها امشى يازمن وتعال يازمن الله جابو جاتو فكرة شاف ست الجيل تقش (تكنس)فى الحوش قام مشى رقد فى سرير فى البرندة وبقى يقول بى صوت مسموع ..يا سيدى الحسن عاد تجيب لى مرتى ..ياسيدى الحسن ما تخذلنى...!أها ست الجيل كانت تكنس تتوقف فجأة بعد ما سمعت كلام الله جابو بقتت تترنح وتتعثر ذى الفى زول لازيها من الخلف وهى تقول سجمى عاد يا سيدى الحسن مودينى وييييييين سيدى الحسن قول بسم الله وهى تترنح حتى وصلت الى الله جابو.... وعاشو فى سلام..
كسرة:
سمعنا سيدى الحسن دى كتير من حبوباتنا وامهاتنا فى زول يعرف الحسن دا منو ..!؟ ومدفون وين..!؟ لكن يبقالى من الصالحين ولا شنو...! افتونا..
الرئيسية
