شاي الصباح في الغابه

""اشتقــنا لي شـــاي الصباح واللمــة والام الحــنون""

كان ياما كان في الزمن الكان طقس اسمه شاي الصباح تعده لنا امنا بالصباح بعد ان تصحى من الصباح الباكر وتضئي المصباح (الفانوس وتصلي ركعتا الرقيبة والفجر وتدعو لنا بالخير والفلاح وتقوم من المصلاية وهي تتمتم (الله يغتيكم ياوليداتي) وتحمل الفانوس لتدخل المطبخ (التكل) وتشيل (حلة اللبن) وتتجه نحو الزريبة (بيت الغنم) وهي تنادي فينا :يا.........ويا........... الحقوني في الزريبة عشان تمسكوا (الغنم الحديثات الولادة ) ونقوم من تحت توب الغته(البطانية او الثوب) عين مفتحة وعين مغمدة وندعك في العيون
ونجري للزريبةالا غنام عندما تامرنا امنا ان نحوشه عند الحليب لكي لا يرضع امه ويحرمنا من الشاي باللبن بشرط ان نجعله قريب من امه لتدر اللبن، بعد ماترى مرمطت البهيمات تحت ايدينا تصيح فينا امنا ياولد ..يابت ..لا براحة .. كتلتو..وننتهي من الحليب ونترك السيخيلات يرضع بعد ان تترك له امنا باقي اللبن في الضرع (ثدي الغنم ) وتذهب الي التكل لتضع اللبن على اللدايات (تولع فيها النار وهي تتكون من ثلاثة طوبات) وتولع النار من بعض انواع الحطب وتامرنا امنا ان نذهب ونصلي الصبح ثم ناتي لشرب الشاي وتغرينا لو صلينا بعمل ليكم لقيمات مع الشاي (زلابية) وهنا نجري لنتوضا وكانت اختي الاصغر لا تتقن الوضوء تبدا من الراس ثم اليدين والرجلين واخيرا الاذنين (اللضنين) ونذهب لنصلي وايضا للصلاة اسكيتشات وحتوتات لا يسعني زكرها ومن بعد نتجه للتكل (المطبخ) واولا وهو الثابت اي واحد يحضر كوبه الخاص به ولو اخذ احدنا كوب الاخر لحدثت معارك ضارية ونتتجمع حول امنا وهي على البنبر(المقعد -الكرسي ) لتراقب اللبن خشية ان يفور ويتدفق وبعد ان يفور( تكتح فيه الشاي) وبينما نحن ننتظر الشاي تامرنا امنا ويابت غسلي الكبابي وهذه المراسيل كنا لا نطيقها في تلك الحظات رغم ذلك نؤديها بسرعة فائقة (هوا) والكل يتجمع في ذلك المكان الضيق الحار والذي لا نحس بضيقه وحره ، ونشرب الشاي اتنين وتلاتة مع (القروض) وغالبا ما يكون من الفطير البائت او القراصة البائتة او من الزلابية بتاعت الصلاة (التي تغرينا بها امنا لنصلي) وبعد التطورات (عمنا فلان) بتاع الدكان عمل ليهو فرن للرغيف (الخبز) من الصباح يذهب احدنا بالجنيهات(الجنيهات الزمان) ليجلب الرغيف بعد ان يقرّض ليه عيشة كاملة ولا تنقص من العدد لان بتاع الفرن يعطيك (هوادة) اتنين تلاتة (شوف الدنيا كانت كيف) وبد ماجاء دقيق سيقااخلوها الله يجازي الكان السبب ؟

كانت هذه اجمل لحظات العمر والتي يشاركني فيها الكثير من من عاشوا بالقري
اكيد الكل لديه حدوتات شاي الصباح لم تفارق زاكرته فتزكروها معي.
االتفسيرلمن لم يعيش في الغابه اوالحناكيش وشكرا

شااااى الصباااح راااااااح بالزات الايام دى 0(ارتفاع اسعاره)مين يااخت ساره بعرف الزلابيه والقراصة والعواسة والهواده ماخلاص شاااى الصباااااح رااااااح

شااااى الصباااح راااااااح بالزات الايام دى 0(ارتفاع اسعاره)مين يااخت ساره بعرف الزلابيه والقراصة والعواسة والهواده ماخلاص شاااى الصباااااح رااااااح

عضـو عدد الرسائل : 50 تاريخ التسجيل : 04/09/2010

والله يا ساره مواضيعك أغلبها مؤثره في الوجدان وتعيد الذكريات غصبا عن النفس فلك التحيه ولشاي الصباح ,,

زائر

فعلا" شاي الصباح زمن كان في البراد كان له طعم خاص والحلة المقننه ويا سلام ونحن صغار في ايام الشتاء نحضر القنقر من الامس لكي نشوية ونشرب بيهو الشاي خاصة في ايام الشتاء وتلاقي امي حصرت العرجون من الليل لكي تدفينا من برودة الطقس واليوم الشاي ياهو الشاي لكن كر كافي البلاء اغلب الناس خلو السعاية واتحنكشو وصارو يشربو لبن البدرة وبقو ناس ترامس ساكت وخلو البراد والحله المقننه

الف شكر لكي اختي سارة صاحبة المواضيع التي تلامس القلب وتصحي الماضي الحنين

ود باب السنط والدكة والنفاج
والحوش الوسيع للساكنين افواج
واللمة التى ربت جنا المحتاج
والنار الدغش
والريكة جنب الصاج
والسكسك المنضوم
حول الجبينة نجوم
والفنجرية تقوم
تقهوج الحجاج
طق طرق يا بن
القهوه كيف ومزاج
طق طرق يا بن
خلي النعدل الراس
ونحصل الترماى

.

ياسلااااااااااااااااااااااااااااااااااااااااام

» السباح الدولي السلطان كيجاب
» ناس الغابه وعقده سوق الغابه!!!!!!!!!!!
» المولد في الغابه
» سرطان الغابه !!!!
» الغابه في الأرشيف !!!