مصطلحات سودانية ( ناس جرجرة ودبرسة) مع الشرح الوافي

زائر

جرجرة : وهي ان يفضي بك اجراء الي اجراء اخر مثل متابعة معاملة حكومية

دبرسة : وهي ردة فعل تصاحب موقف صعب او حالة خلو الجيب من ( الضحكات) الدنانير

دربكة : يمكن مشاهدة هذا الفعل من غير ما نشرحو عندما يصل مهاجمو فرقنا الكروية الي منطقة جزاء الفريق الخصم

حندكة : وهي اظهار شي ( لذيذ ) (لحم ضاني) مثلا" قدام شخص اخر لا يستطيع ان يملكه او تلقي ليك طفل ماسك حلوي مصاص وقاعد يحندك طفل اخر امامه

سركنة : وهي بذل المال بعطاء او شخص تطلب منه خدمه ويتسركن معاك اخر سركنه اي يقف معاك وقفه حية

جلدة: الزول الجلدة معروف عكس السركنه ( البخيل )

شحتفه : شحتفة الروح حالة تصيب النساء دون الرجال وتدول علي عدم الصبر

سلبطة : وهي ادعاء شخص ملكية غرض لا يخصة

شربكة: وهي تداخل الامور مع بعضها البعض يقول ليك الزول ده بتعاع شربكة ما تدخلنا معاهو او ماتشركنا معاهو في امر ما

بصبصة : وهي النظر الي شئ ليس من حقك ان تنظر اليه خلسة زي بصبصة الطالب في الامتحان

حمبكة : هو فعل يستخدم عند عدم الرضا بالنتائج علي الرغم من صحتها يعني ( خرخرة ) ساااااكت

شمشرة: وهي التلصلص للتعرف علي اخبار الاخرين دون رضاهم يقول ليك الزول دا( شمشار)

طرطشة: تدل علي التهور وفقدان البوصلة يقول ليك الزول دا مطرطش سااكت

قرطعة : وهي شرب الماء او اي شراب بسرعة حتي تصدر صوت قرطعك قرطعك

فرفشة : حالة تدل علي الانبساط والمرح والسرور

كشكرة: وهي دعوة شخص ان تشاركة شي ما مثل اكل وهو في الداخل يتمني ان تقول اكلت وتنصرف

كنكشة: وهو التشبث بالشي والاصرار علي تملكه واسالو( مبارك وبن علي ) عن الكنكشة

جغمسة: وهي تصاحب الاطفال دائما" يقول ليك ما بأكل مع الشفع ديل جنهم جغمسة الاكل

مزمزه : وهي الاكل بتلذذ ومزاج

كبكبة : شوف حالة الموظفين عندما يطب عليهم المدير فجئة وانت تعرف المعني

كرمشة : تجاعيد تصيب الجلد مع التقدم في العمر او كرمشة القميص اي انكماشه

كشكشة: يقول ليك الزول دا مكشكش اي مجنون

هادية شيخ عووضة كتب:: جرجرة : وهي ان يفضي بك اجراء الي اجراء اخر مثل متابعة معاملة حكومية

مشكـورة ياهـادية على التعـاريف اللذيذة .. بس نسـيتي واحـدة جمـيلة وغريبة وهي ..
هــترشـــــــة : ( ممكن تكون الكلام الكـتير وخاصة لما يكون متواصـل وبدون إنقطـــاع ... )

.

زائر

محمد محجوب كيري كتب:

هادية شيخ عووضة كتب:: جرجرة : وهي ان يفضي بك اجراء الي اجراء اخر مثل متابعة معاملة حكومية

مشكـورة ياهـادية على التعـاريف اللذيذة .. بس نسـيتي واحـدة جمـيلة وغريبة وهي ..
هــترشـــــــة : ( ممكن تكون الكلام الكـتير وخاصة لما يكون متواصـل وبدون إنقطـــاع ... )

.

مشكور اخي محمد علي المرور

وهترشة دي مايها ( هضربة ) ذاتا وهي الكلام الفاضي و المتواصل دون انقطاع

نسيتى النسنسه

البلبله و الدهنسه و كسٍير التلج

قزقزة : يقول ليك الزول دا جنو قزقزة تسالى

قرمشة : الشافع دا انت قعد تقرمش شنو...

حرفنة : تطلق على الزول الحريف

شخشخة : يقول ليك والله الرادى دا من الصباح معزبنى بالشخشخة

كرفسة : الهدوم قبل المكوة

سمكرة : العربية لما تعمل حادث

فرفره: من سرعة الحركه والمراوغه{جمال فرفور}
كركره: جر الشى وعملت صوت مزعج..
عصعصه: زول ضعيفونى ومعصعص
سرسره: تقال للماء المتواصل الجريان القليل الكميه {سرسار}
دشدشه : تكسير الأشياء
طرطره: أى مطرطر أومادى بوزو
شرشره: تبول الطفل......

سكسكه: صوت السرير أو الحديد مع بعضه..أو...!!

زائر

الاخ عصام

والاخ مجدي

والاخت سماح

الفين شكر علي المرور الكريم

القرضمة: يعني شخص تظهر علية علامة النعمة ويبدأ يتقرضم علي الناس اي يشوف نفسه

الغتاته: ودي ما اكثرها في زمنا واحد يقول ليك كلام وفي نفسو قصد اخر

البشتنه: الظهور بمظهر غير مرتب

الزوزوه والشرفنه والملقوف: كلها تدل علي الشخص الذي لم يراء خير بمجرد ما يشوف نعمة ينكب عليها كب

فاصل ونواصل

عدناااااااااااا ....

الخرخره : تقال عندما تغلب شخص فى لعبة ولا يعترف بالغلب

الخرمجة : عندما ياتى شافع ويجد الشفع يلعبوا (ياتلعبونى معاكم يا اخرمجا ليييييييييكم)

الفشخرة : دا يكون الزول ما عندو حاجة وتلقاهو متفشخر الفشخره فوق كم

زائر

تركشة : يقول ليك تركش الباب معاك اي اجعله مواريا"

بعزقه : تطلق علي المال حصريا" لا سواه خاصتا" اذا كان مال عام

بطبطة : وهوحالة عدم المقدرة علي الوفاء بالالتزام

برطمة : التفوه بكلام غير مفهوم

بحلقة : النظر في بلاهة وغباء واندهاش

رمرمه:الأكل الكثير .....رمرام

سفسفه:الأكل ...وأكل مال الآخرين

كبكبه: حاجه عجبته وبقى يمشى ويجيها...

رضرضه: رضرصه وكسره وأنت ليك الحق

طقطقه: صوت مرق عود و....

بربره: أتسع الجرح وأنتشر وامتد..وكدى نودى الزول ده الشفخانه قبل ما الجرح ده يبربر أكتر...وبجيكم صـــادى..

قلقه
القندفه
البلطجه
القرضمه

زائر

دردرة : يقول ليك الشافع دا مدردر يعني نجيض محل ما ترميه حالو يمشي

ضكرنة: تطلق علي الولد الشجاع القوي

غطرسة: ياها عجرفة ذاتا لكن ذائدة حبتين

فهلوة: شطارة مع انتهازية

فنجطة جري الحمار بغضب و أستياء

زائر

حاتم سعد سالم كتب:: فنجطة جري الحمار بغضب و أستياء

شكرا" علي المرور اخي حاتم وفي انتظار مصطلحات جديدة من نوع اخوات فنجطة

تأتأة فأفأة من أمراض الكلام
قهقهة الضحك بصوت عالي
ثرثرة كثرة الكلام
بأبأة دي ولا حاجة

هههههههههههههههههههههههههههه
حلوة ياحاتم
واحلي ياها ديه

زائر

مشكورين سيادة المدير العام

الصادق ابو

والاخ عوض عبد القادر

علي المرور الرائع

لولوه: يقول ليك الزول ده لو لو الحديث اي جعله يسير في غير مساره الصحيح

عكلته: عكلت الموضوع اي اخره او أبطاه او حاول يفشله

سنسنه ...تقال للذى تناول {عصير البلح...!!}

طنطنه ...للذى لم يعجبه الكلام..!!

دندنه....للذى يغنى بصوت منخفض...

برطعه.... على وزن فنجطه...وحاسب ياحاتم الدحيش ده لسه جديد يعنى لو

مامسكته كويس فى القلاده بيعمل ليك شكشكه....هههههه

» مصطلحات جديده جدا
» مصطلحات سياسيه
» مصطلحات من بلدنا
» مواقف سودانية اصيلة
» اليكم دليل مصطلحات عام 2013