يااااااا زمن أرجع شويه....!!

بدوووووووووووون اى مقدمات حقيقة والله الواحد فينا يتأسف على ذلك الزمن الجميل الذى إرتحل بى ناسو وأهلو الطيبين والحلوين والشىء الوحيد الذى يجعل ذلك الزمن زين هو انو الناس كانت عايشة بالبساطة والناس كانت على السجيه وعلى الطبيعة ومن غير تَكَلُف بما أنو عيشنا زيلية ذلك الزمن أو قل فى نهايته ولكن نظل وسنظل نستمتع بها لأنها محفورة فى الزاكرة الدائمة كما النقش على الحجر ومن بين تلك الزكريات نبداها بالمدرسة ...
وين الخرتاية (الشنطة) تلك القطعة من قماش الدمورية باقى جلابية قديمة ولا لحاف تهالكت جمباته واصبح يلفظ ما بداخله من قطن بعد ان اخذ حظاً وافراً من الترقيع والرتق .. كنا لمن نقوم الصباح تلقى العيون دى مخيته بالقَضى ما تقدرى تفتحى عينك والسبب اللعب بالتراب خلال اليوم وفى الصباح حبوبة كان تدفىء شوية موية مع حب الشاى وتجى تمسح عيونى بى طرف طرحتها والتى كنت اشم من خلالها مجموعة من الروائح المنبعثه منها ريحة البصلة المحمرة ..وريحة زيت كركار ... وريحة هبهان مصرور فى طرف الطرحة ....وفى فصل سنه أُولى كنا نحمل داخل الخرتاية تلاته نوتات(النوتة هى عبارة عن الكراس مقوع النُص بالعرض) وكنا نقرأ تلاته حصص حصة الحساب(الرياضيات حديثاً) وحصة العربى (اللغة العربية هسع) وحصة الدين (التربية الاسلامية حالياً) وكنا نستعين فى حصة الحساب فى العَد بالقصب اااااااى القصب وما كان زى قصب الزمن دا كان عندو نغمة خاصة فى الذهاب والعودة وكنا نحفظ عددهم داخل الخرتاية عن ظر قلب ولا تستطيع ان تتنازل عن واحدة منهم مهما كان ونقوم بعدهم صباح مساء .. وقلم رصاص كانت امى الله يدها العافية لمن تجيب قلم الرصاص تقطعو النُص تبراهو بالموس ليس بُخل لكن كان لحكمة تعلمها هى وانا عرفت فيما بعد وانا كان كُل همى ان احصُل على النص الفيهو الإستيكة عشان امشى أحندك صاحباتى ... ما ياهو عقل الشفع عاد ... يتبع ...

ياسلالالالام على الزمن اللى فات بى وقته لكنه باقى بذكرياته الجميله

يازمن وقف شويه وأهدى لى لحظات هنيه ،وبعدها شيل باقى عمرى...

والله ذكرتينا أخت سماح بطابور الصباح وقبل دخول، الحصص كل فصل يدخل

فصله بنظام,نقوم بعملية النظافه ونلف حول المدرسه داخلها وخارجا

وفى طابور الصباح يكون فى تفتيش عام...

الأظافر الملابس الشعر ,و......

كراسه أودفتر العياده..والزوغانات...

البستلات المليئه بالزلابيه والطعميه والسكسكانيه والشعيريه...

واللبن الرايب بالفطير وقراصه سمنه بى سكر.....والله أيام..

أمشى أشوف البستله فيها شنو ويجيكم صادى...

والله يا بت عوض لما قريت الموضوع شميت ريحة التوب و تخيلته منظر عيونك بيقضاها زى عوضيه ككريه.

صاحبك كامل بشير يا مجدى فى اجازتى للبلد لقيت ولدو جاى من
المدرسه شايل ليهو حفاظة اكل من بلاستيك بالوان خلابه قلت لى كامل ده لو كانت فى زمنكم قبل ما اتم كلامى قالى ياتا ده والله كنا قرقشناها زاته.

عصام فتح الرحمن سالم كتب:: والله يا بت عوض لما قريت الموضوع شميت ريحة التوب و تخيلته منظر عيونك بيقضاها زى عوضيه ككريه.

صاحبك كامل بشير يا مجدى فى اجازتى للبلد لقيت ولدو جاى من
المدرسه شايل ليهو حفاظة اكل من بلاستيك بالوان خلابه قلت لى كامل ده لو كانت فى زمنكم قبل ما اتم كلامى قالى ياتا ده والله كنا قرقشناها زاته.

السعداب أغلبهم فيهم روح الفكاهه والدعابه والله مشتاقيييييييييييين لحاتم سعد...ونكاته ...الرائعه......ادينا أخباره......

وبستلة الفطور بي كسرة(الصناعية ) التمر او ملح الشطة والفطير بالروب وتظل الزكريات هي الامل الذي نعيش عليه

يااااتختناااا سماااح اقول نحكى ونعيش الزكريات على سنين محزنة متاصلة فينا باارك الله فيك

يلى الاياخوان مجدى وعصام هنالك قصص فى فترتكم كانت اقرب من قصص توم وجيرى فى عهدكم
لانوجيلكم كان جيل صعب جدا ياريت تورونا الكفاااوى الحصلت زمااان

اخينا الشفيع عبد الكريم عوض زاخر بهذة القصص وياااريت يطل على هذا البوست ونسمع منة مالم يخطر فى بالكم

عدنااااااااااااااااااا ....
ومن الأشياء البقت زكريات فى فصل سنة أولى انا كنت طوية حبة الأستاذة قعدتنى فى الكنبة الطيش .. حسب ترتيب الاحجام عشان ما تضارى الطالبة الوراكى من السبورة .. وانا زعلت وكنت مفتكر الزول البقعد فى الكنبة الأخيرة بيجيب الطيش مشيت طوالى كلمت أُمى .. قالت ما تزعلى أمشى بكرة قولى لى الأستاذ انا قاعدة وراء ما بشوف كويس .. طوالى شلت كلام أُمى صرة فى خيت .. ومنتظر الأستاذة تجى اها جات قبل ما تبدأ فى الحصة قلت ليها فضلك ... فضلك .. يااستاذة قالت لى اقيفى على حيلك فى شنو ... قلت ليها أُمى قالت ليكى انا لمن اكون قاعدة وراء مابشوف كويس ... فشعرت بالمعلمة خالجها نوع من الضحك ممزوج بنظرة لبراءة الأطفال ... وعالجت الموضوع بى حكمة .. أجلستنى فى الكنبة الأولى لكن طرف تال الحيطةعشان ما اضارى الوراى.. بما انو كنت اجد معاناة فى الخروج لى فسحة الفطور نسبةً لموقى الغير مميز انتظر زميلاتى حتى يخرجوا ولكن كان فى نوع من الشيطنة والتمرد حبة كنت انتظر خروج المعلمة وإشعبط فى كنبة الأدراج واتلب قدام .. ولكن عند دق الجرس كنت أول من يردد تلك النغمة المميزة .. أول واحدة فى كنبتنا ... أول واحدة فى كنبتنا .... ياربى دا كان عواره... ولا براءة... قايتو بقت زكريات ... ولنا عودة

زائر

والله يا سماح مابالغتي عديل في السرد بطريقة ولا احلي وانعشتي زاكرتي ل20 سنة فائتة من عمري ومنتظرنك تواصلي لينا اليوم الدراسي ده لحدي شكلتكم بتاعت الشارع الجم النيم والحفير

الأخوة الكرام.... (طبعاً مؤتمر وطنى وكدى) مجدى / عصام /اسماعيل /هادية
اشكركم على المرور المميز...... تعالوا هنا انتو فطيتو مرحلة الإبتدائى دى ولا شنو...!؟ وييييين زكرياتكم دى تعتبر احلى مرحلة دراسية فيها زكريات بالكوم....

وأليك وآحده من بيت الكلاوى.....

درست جزء من الأبتدائى بمدرسة الخرطوم شرق{برج البركه الآن.}

وفى حصة العربى دخل أستاذ شاكر الأستاذ الراقى المهذب فى شخصه وهندامه

وبدأ تسميع الأناشيد...وفجأه حصل هرج ومرج وصراخ غير عادى ،وخرجنا

كلنامن الفصل ،الخفير عم عبدالله رحمه الله وسيف بتاع الكشك {الفطور}

جونا جارين بى عكاكيزهم وعصاياتهم...

في شنو ياجماعه..الحاصل شنو..المدير جاء مقلع عيونوا....

الفيران تهاجم الفصل ..مجموعه من الفيران ....أتى بها سامى يوسف..

أسمن وأطول وآحد فينا وهو الألفه بتاعنا...لأنه وأصحابه ناس الكنبه

الوره ماكانوحافظين الأناشيد..

وأستاذ شاكر طبعا" عارفينو بيكرة الفئران عمى....

وكدى النمشى نجيب لينا قفه كدايس من السوق لدحر هذا التمرد..؟

وبجيكم صادى..

يااااااا زمن أرجع شويه....!! 3730

فى 1991 كنت فى زيارة الى البلد لحضور زواج بنت عمى عبد الرحيم نقدالله وسجلت زيارة الى مدرسة غرب دنقلا المتوسة بنين التى كانت من الرواكيب بعد الفيضان واذكر كان معلم الرياضيات الوحيد فى المدرسة هو علاء الدين حسن عيسى وما ان عرف انى معلم رياضيات الا وذهب بى الى المدير هاشم عبد الله احميدى وحلف بان استلم جدول حتى سفرى فاخزت الطباشيرة والمسطرة ودخلت الصف الثالث وبدات فى المراجعة لاحظت انهم ينظرون الى باندهاش وذلك لان طريقة كلامى تختلف عن ناس البلد وكلما اسال سؤال لا يشارك احد وانا متعود على اسلوب المشاركة عندى الفصل فى مدرسة الكلاكلة اغلب الطلاب يرفعوا ايديهم لمشاركة حتى اننى اتحير فمن يشارك وعرفت ان اغلب الطلاب فى البلد لايحبون المشاركة كما ان كلمة فندم كانت استغرب لها لاننى تعودت على كلمة استاذ المهم خلصت الحصة وفى اليوم الثانى جيت راكب حمار وذاهب بالقرب من المدرسة وشاهدنى الطلاب وقال واحد داك الاستاذ الدرسنا امبارح وقال اخرين لا ليس هو ضحكت قضيت معهم ايام جميلة اذكر والجلد كان بصراحة حار شديد كان فى مكتب المعلمين عود مثبت فى نص المكتب وكان يحضر من يراد جلدة ويثبت العود فى صدرة وييمسكة معلم من يدية ويجلدة اخر بسلك الكهرباء بعدين فطور المعلمين كان ياتى من الحلة .
مرت الايام واغتربنا وقابلت الاخ عمر عبد الرحمن حسين وقال لى هل درست فى البلد قبل كدة قلت لة فترة بسيطة قال لى رغم انك انك قعدت ايام الا انا مذكرنك

samah awad كتب:: الأخوة الكرام.... (طبعاً مؤتمر وطنى وكدى) مجدى / عصام /اسماعيل /هادية
اشكركم على المرور المميز...... تعالوا هنا انتو فطيتو مرحلة الإبتدائى دى ولا شنو...!؟ وييييين زكرياتكم دى تعتبر احلى مرحلة دراسية فيها زكريات بالكوم....

ياختنا سماح المؤتمر الوطنى المؤتمر الوطنى ناااااس الحيكومى ديل زاااتم اقول مؤشر ماااشى تشااد جونى فى مكاانى معليش استأذن

اقول عندى اصحاااب كتااار اتنين مع الحركة واتنين مع الحيكومى واتنين دييييييل النااافعنى ...؟؟ انا مستغل وبحب اكون مع الصاح

فى احدى القصص التى لازالت فى زهنى

فى احدى حصص الانجليزى الكانت بعد الفطور دخل الاستاااذ الفصل ومعة سوط عنج لتسميع الاسبلن بتاااع يوم الخميس الفات

المهم بدا يسمع الكلمات بدى باللكنبات الاولى واحد تلو الاخر ونا والمعاااى كنا فى الكنبة الثالثة فى يوم التسميع اخزنا الكنبة الخااامسة
عنوة من الموجودين فيها والزمنااهم بالجلوس فى مكاننا فى الكنبة الثالثة وذالك امل منا بان لايأتى الدور علينا بسرعة وأمل منا
ان يضرب جرس نهااية الحصة ونكون افتكينا من التسميع
على كل قعدنا فى الكنبة الاخيرة انا والاشخاااص المعاااى ودور التسميع لحقنا قدامنا طاالب واحد بس وكان يبدو بينا الاربعه
ودخلنا فى حااالة حبس انفاااس وعينا فى سوط العنج يكوى ظهور القدامنا كوى اتانى الدور لكن قبل ان يسألنى الاستاااذ
عن الكلمة التى يرد ان اسمعها لة جرس نهاية الحصة ضرب وقال الاستااذ نسمع فى الحصة اللجاااية طبعا ماصدقنا
وبسرعة شديدة قمنا تااانى رجعنا لى كنبتنا الثالثة حقتنا فى الاول وتسببنا مع القاعدين فيها بحجة انها كنبتنا
المهم تركنا الكنبة الاخيرة وضرب الجرس ببداية الحصة الثانية جاء الاستاااذ وقال لطلبة الفصل انحنا واقفين فى يااتو كنبة
ناااس الفصل قالو ليهو فى الكنبة الاخيرة افتكرنا الاستااذ حينسى اشكالنا ويقوم تاانى يسمع للجماااعة الطيبين الاخدو علقتم
فى الاول لكن الاستااذ كان نبيه وفجاء ينزل فينا ضرب بى السوط فى ظهورناا كوااانااا كوى

قااام قال لى اسبل الحيطة بالانجليزى اسمة شنو طبعا انا بالخوووف ماااقدرتة اتكلم وسمعت ليهو الحيطة بالانجليزى كالاتى
(ad دبل حيطى )

samah awad كتب:: الأخوة الكرام.... (طبعاً مؤتمر وطنى وكدى) مجدى / عصام /اسماعيل /هادية
اشكركم على المرور المميز...... تعالوا هنا انتو فطيتو مرحلة الإبتدائى دى ولا شنو...!؟ وييييين زكرياتكم دى تعتبر احلى مرحلة دراسية فيها زكريات بالكوم....

يلا ياشباب كل زول يحكى لينا طُرفه من سنه أولى وحتى.......

يااااااا زمن أرجع شويه....!! Mwso3ticb2956e374

» المعــــــــــايدة اول ايـــــــــام العـــــــــــــيد
» من يوميات زوجه سابقه..!