النوم البجيب اللوم

زائر

يقضي الانسان ثلث عمره في النوم
هكذا يقول العلماء
اما الثلثان الاخران
في الشلهته والجري والفصاحه الكلام الكتير وصرف العربي والمشكله بعض الناس يتكلم حتي وهو نائم ويلقي بمعلومات ويقول كلام ربما يلقي الي التهلكه ويؤدي به الي 60 داهيه
داهيه تنطح داهيه خاصه اذا تمت جرجرته من قبل زول غتيت (في الغالب المدام )

فصنف من الناس تلقي واحد تلقاهو بشيلو حمار النوم وتلقاهو لافي الحوش كلو ياخ قال ليك في واحده سمينه شديد وعامله نظام غذائي عشان تخف شويه وبعد كدا وزنها ماشي في زياده المهم مشت لي دكتور
خواجه من النوع البقول ليك ما يتحير الا مغير
المهم علموا كاميرات مراقبه في بيت صاحبتنا دي ولقو ليك صاحبتنا دي نص الليل بشيلها ليك حمار النوم وتمشي كشك كشمك للمطبخ وتقول كدا تفتح التلاجه وترمرم وتسفسف وتقيف زمباره وترجع تواصل نومها

والنوم ذي مابقولو سلطان
بيكبس عليك في اي زمان واي مكان
تقول شبكه زين
بكبس عليك في محاضره
في خطبه جمعه
اجتماع
والعجب لو داهمتك نومايه كاربه كدا في مواصلات عامه وتصحي مخلوع وتلقي بسؤال بري انا وين؟؟
فيقول لك من بجانبك انحنا في الكوبري
فتصيح في الكمساري نزلني هنا انا محطتي فاتت
ويرد عليك الكمساري بمساخه انزلك في البحر يعني ؟؟

ولأن لله في خلقه شئون فأن البعض يرعي غنم ابليس بالنهار ويظل يعد النجوم بالليل دون ان يكون نائم يطش شبكه حتي تمر فتره طويله حتي يستوعب اين هو

حكمه الله بعض الاشخاص لما يصحو من النوم تلقي صوف البطانيه في شعرو والعيون محمره التقول هنااااي ماف داعي نقولها
والشعر منكوش واثر كراب العنقريب فوق جضومو عامل 11111 والخشم ماسوره مكسوره في بيت عذابه مافيشين
باختصار كدا
وشو يلعن قفاه علي قول الانجليز
بينما تجده بالنهار في منتهي الوسامه
والجمال
لذلك نجد ان معظم الفتيات لهن برنامج وطقوس قبل النوم
لف شعر
ومسيح وش وكرعين
ولبس شرابات
تفاديا لما ذكر سابقا
كما ان البعض يشخر وينكر وفي لحظه ما ربما تسمع شخيرك بام اذنك
والبعض ينام وخشمو فاتح وواحد تاني تلقاهو نائم مبتسم او كاجم عينو او عينو نصف مغمضه يعني عامل فيها مفتح
والعجب واحد تلقي نومو خفيف هبار شرك بس _الترجمه تحت يا الما بتعرفو هبار الشرك _
والنوع دا تلقاهو يقوم من نومو فت ويسك الحرامي
والبعض نومو تقيل ودمو بقري دا الحرامي يجي يسرق البيت ويعمل شاي ويحضر المسلسل وتلقاهو نائم وماجايب خبرويصحي بعد خراب مالطا
عشان كدا بنلقي بعض البنات في شروطهم للعرس بقولو الزول النومو تقيل ما عازنو

زمان في البلد يصحو الشفع للعشاء عشان كانو بنومو من نجمه الضيفان ويتلموهم كلهم في صحن العشاء الموضوع علي الارض وغالبا ما يكون كسره بي لبن تلقي واحد ايدو بتجلي من الصحن وتخش في التراب المسكين تلقاهو نعسان
وبفتش في خشمو عشان يدخل اللقمه وواحد تلقاهو يكورك يايمه يد الجنا دا مليانه تراب تعالي غسليها ليهو وبعد داك الوالده تقول ليهم غسلو يدينكم وخشمكم عشان ناس بسم الله ما يجو يمصوها ليكم

واخيرا من المعتاد الطالب ينوم في الحصه او نلقي استاذه تقول للتلاميذ قولو أ اسد با بقر لغايه نخت الخرطوش في الزير بس الغريبه الاستاذ يجي من بيتهم عشان يكمل نومو في الحصه متوسدا يديه ومنبطحا علي الدرج وبيقول للطلاب اقرو اي حاجه
ويتحرك الطلاب في شكل قطار ويغنون كدا كدا يا الترلا قاطرها قندران
ويصيح البعض ويطرقع اصابعه فوق راس الاستاذ ابشر يا عريس
ولا حياه لمن تنادي
وعندما يرن جرس انتهاء الحصه يربت احدهم علي كتف الاستاذ بكل حنان ورقه قائلا الحصه انتهت يا استاذ

تخريمه

ا
لترجمه

ترمرم وتسفسف = من الفعل رم وسف وهي مصطلح استخدم للناس البسرقو اموال الدوله
هبار الشرك = اسألو منو اسماعيل كيجاب
حمار النوم = كائن خرافي يعيش في القري وله 6 كرعين وضنب ومرات بكون فيهو سرج ومرات تركب فيهو بالبردعه ساي
البردعه = كلمه ما عندها معني وبتخش في الجمله ساي
الزير = عباره عن هناي كبير كدا زمان كان بختو فيهو المريسه
المريسه = عباره عن هناي بعملوها من الهنايه وبختوها في الزير

زائر

والبعض ينوم نومه اعضاء منتدي الغابه

زائر

النوم يجيب اللوم

موضوع خفيف زي زيت صباح

تشكر اخي تحياتي

» ماهي حقيقة حمار النوم؟
» 1- ســــــــؤال الــــيـوم الأول ......
» أُزجى التحية للمرأة السودانيـــــــــة
» الأستاذ أبو عركى البخيت
» جااااااكم البجيب ليكم الكتاحة وعدم الراحه