أبوي أدني قروش الشهر..وإن ما أديتني ياهو من هني ماني مارق ولابمشي المدرسه زاتو .
- يا عمار يا ولدي الشهر متين تمه قول بإسم الله !!!
- يا أبوي قروش الشهر الفات أنا مادفعتها.. والأستاذ قالنا الما يجيبه ما يجي .
- أمش قول للأستاذ حقكن ده أبوي لاهسع ماهيتو ما صرفه ..وأسألو هو ماهيتو صرفه؟؟؟
- لكن يا أبوي هو قالنا البيجي وما معاهو قروش الشهر بطردو من الحصه والولاد كلهم دفعوا بس فضلته أنا ومعاي شُفع شوييين .
- كدي أمش وخلو اليطردك ..إن ماجيت وكسرته فوقو بسطونتي دي يبقي أبوي ما جابني ... وبعدين هي القروش دي قاعدين يسوبه شنو؟سمع أضاني البياكله الدود دي الوزير قال مافي زول يدفعلو قرش أحمر كل شي نحنه مجهزنو للطلبه .
- ياأبوي دي قروش الكهرباء والمويه و....
- أقيف... أقيف... طريتني الكهرباء ...يا بت ...ياساره ...ساره...كدي شوفي الجمره الخبيثه نعل كهربته ما كملت؟؟؟
- باقي فيها فد متر...والليله إن ما جبته لنا كهرباء يانا القاعدين في الضُلمه.
-الكان كدي يا بتي جهزي فانوُسك من ضو. ..وأووووعك تقوليلي ما فيهو جاز .
- يخربو البُلاله ...يابس كرو...والله علا عاد أكبلو من الزير.
- والله يا جماعه البت دي إن رسلوها للبحر تقول مافيهو مويه...وينه قزازة الجاز الجبتها ليكن الشهر الفات وقوتلكن خلوها إحتياطي لليوم المتل يومي الأسود ده .
- إنته يا أبوي نسيت؟ ما كبيناها فوق الفحم علي تلات مرات وولعناها بيهو ساعة الأنبوبه قطعت وإنته مامليته .
- سمح خليناهو الفانوس أمشو للدكان جيبولكن شمع.
- الخدر سيد الدكان وقفنا من الجروره من أول البارح وقال إن أبوكن ما سدد العليهو أنا تاني ما بدينكن.
-الكان كدي زح من قدامي يا ولد!! اللشوف الليلي القمره بتمرق؟؟؟...ضوكن الليلي نور ربنا.... قمره سااااكت.
- يا راجل ده كلام شنو البتقول فيهو ده ...إنته جنيت قمرات شنو ونجوم شنو ؟؟ سووووده علي الياباني ..الولاد يقرو بالقمره كمان؟ياراجل ما تقوم لافوق تشوفلك قروش تتسلفه ولا تشوفلك بصاره آآخره نمشيبه حالنا .
- أووو....أها.... البوليس الدولي وصل...إنتي جيتي خلاص.. خشمك الزى النقدوبة ده ما يسكت اصلوا ورررر ورررر تعالي تمي الناقصي أصلو هو يوم باين من أولو ماحايعدي علي خير.
- عليكن الله يا بنات أمي تشوفن غبا الراجل ده...أها باقيلك نسوي شنو؟...ويكون في علمك أنا أُختي وولاده الليلي جاين مقيلين معانا دايرلنا خدار ولحمه وسُكرنا كملان والأنبوبه أصلها يييديك المدردقه ليها تلاته يوم دايري الملي .
- أُختك وولاده الزي الفريق القومي ومدربو ديل هسع قبال كم يوم ماكانوا مقيلين هني وقضو علي الأخدر واليابس ..تاني الجايبن لينا شنوووو..!!؟؟
- متين جونا!!!ياها جيتن الفي العيد ديييييك؟
- في العيد في رمضان في المولد ...المهم كانوا هني قريييب ده ...هن ما يهبطو عند أهلن ...كل مره ناطين جايننا إزيكن بلا غرض طيبين بلا مرض...نحنه غير المناسبات والشديد القوووي قاعدين نمشيلن؟؟
- يا أبوي مواعيد الجرس قربت ...ياأديني قروش الشهر ياكمان تمشي معاي الحجل بالرجل ...أصلي مابمشي براي للمدرسه .
- يابت....ساره... أديني جزمتي ...أنا بمشي معاك ...الليلي عاد يا مُدرسكن ده يا أنا!!!
-يا أبوي جزمتك لبسه حاتم أخوي...قال شبطو إنقطع وما لقالو شيتاً يلبسو ودخل في جزمتك .
- قلتي شنويا بت؟؟؟ لبسه حاتم؟؟ نان أنا أمشي الشغل بيشنو؟؟أمشي حفيان !!عليكن الله آ ناس تشوفو الخازوق السوه الجنا ده فيّ.
يتببببببببببببببع .....
الرئيسية
